Huawei расман МаtеBook Fold Ultimate Design’ни тақдим этди, уни дунёдаги биринчи букланадиган экранли компьютер деб атамоқда, деб хабар беради HuaweiCentral.
Янги маҳсулотнинг қалинлиги очилган ҳолатда атиги 7,3 мм, оғирлиги эса 1,16 кг бўлиб, клавиатурага эга эмас — қурилманинг пастки қисми ёпиқ ҳолатда сенсорли клавиатура сифатида ишлатилади.
Тандем OLED дисплейи очилган ҳолатда 3,3К ўлчамли 18 дюймли диагоналга эга бўлиб, томонлар нисбати 4:3 га тенг, букланган ҳолатда эса нисбат 3:2 га тенг бўлади.
МаtеBook Fold экрани кенг P3 ранг гаммасини, шунингдек, HDR Vivid ва HDR режимларини қўллаб-қувватлайди. Huawei бу дунёдаги биринчи мослашувчан янгиланиш тезлигига эга ва ўз синфидаги энг паст энергия истеъмолига эга бўлган тижорат дисплейи эканлигини таъкидлайди.
Конструкциянинг асосий элементларидан бири бу 285 мм узунликдаги шарнир (айланма кинематик жуфтлик, яъни уларга айланма ҳаракатни таъминлайдиган икки қисмнинг қўзғалувчан бирикмаси) бўлиб, ишлаб чиқарувчининг таъкидлашича, у оддий ноутбуклардаги шарнирлардан анча катта юкларга бардош беради. У қурилмани 0 дан 20 даражагача бўлган бурчакларга силлиқ очишга имкон беради ва уни 30 дан 150 даражагача бўлган чегараларда маҳкамлайди.
Совитиш учун иккита вентилятор ва ўта юпқа буғлатиш камераси ишлатилади, орқа панел металлдан ясалган ва чарм билан қопланган. Шунингдек, юмшоқ очилиш механизмига эга ўрнатилган таглик ҳам мавжуд.
МаtеBook Fold Huawei томонидан ишлаб чиқилган HarmonyОС операцион тизимида ишлайди. У бренднинг бошқа қурилмалари — смартфонлар, планшетлар, компьютерлар билан биргаликда ишлаш функцияларига эга. Huawei экосистемасидаги қурилмалар ўртасида маълумот узатиш тезлиги 160 МБ/с га этади.
32 ГБ оператив хотира ва 1 ТБ SSD бўлган моделнинг нархи 23 999 юан (тахминан 3328 доллар), 2 ТБ хотира бўлган версияси эса 26 999 юан (тахминан 3744 доллар). Ҳозирда янги маҳсулот фақат Хитойда мавжуд ва глобал бозорга чиқарилиши ҳақида ҳали ҳеч қандай маълумот йўқ.
Изоҳ (0)