Samsung kompaniyasi EMDX nomli 32 dyuym hajmli, rangli elektron displey (e-paper)ni rasman sotuvga qo‘ydi. Qurilma asosan raqamli ma’lumotlarni namoyish qilish uchun mo‘ljallangan bo‘lib, undan do‘konlar, restoranlar, jamoat transporti va boshqa ommaviy joylarda foydalaniladi.
EMDX’ni do‘konlarda mahsulot haqida ma’lumot, narxlar va aksiyalarni ko‘rsatish, raqamli vitrinalar va e’lonlar sifatida ishlatish, metro, avtobus bekatlari yoki aeroportlarda jadval, yo‘nalish va e’lonlar berish uchun ham foydalanish mumkin.
Mazkur displey E-Ink Spectra 6 paneliga ega bo‘lib, 2560×1440 piksel aniqlikda tasvir beradi va 54 minggacha rangni ko‘rsatadi. Bu dezering algoritmlari yordamida amalga oshadi.
Uning xotirasi 8 GB, ulanish uchun Wi-Fi 5 va Bluetooth 5.0 modullari mavjud. Shuningdek, USB-C porti orqali zaryadlash va Ethernet adapterini ulash mumkin. Displey 4600 mA/soatli akkumulyator bilan jihozlangan bo‘lib, agar tasvir faqat kuniga bir marta yangilansa, 200 kungacha uzluksiz ishlay oladi.
Displey o‘lchami 725×420×17 mm, og‘irligi esa 2,4 kg. U VESA 200×200 mm standartidagi kronshtyenlar orqali devorga o‘rnatilishi mumkin.
Qurilma Tizen 8.0 operatsion tizimida ishlaydi. Kontentni boshqarish uchun E-Paper App mobil ilovasidan foydalaniladi. Ilova orqali kontentni yangilash, grafiklar yaratish va pleylistlarni vaqt oralig‘ida sozlash mumkin.
EMDX ayrim mamlakatlarda allaqachon sotuvda bo‘lib, taxminan 1400 dollarga baholanmoqda.
Izoh (0)