Suvdan qo‘rqmaydigan va sog‘liqni kuzatib borish bilan bog‘liq ko‘plab mashhur funksiyalarga ega Fire-Boltt Ninja 3 “aqlli” soati taqdim etildi, deb xabar beradi GizmoChina.
Hindiston kompaniyasining ma’lum qilishicha, yangi “aqlli” soat Bluetooth va ichki o‘yinlar borasida qiziqarli funksiyalarga ega.
Soat piksellar nisbati 280x240 ga teng 1,69 dyuymli suyuq kristall displey bilan jihozlangan. Foydalanuvchi interfeysida navigatsiya uchun yon tugma mavjud. Taqdim etiladigan opsiyalar orasida sog‘liq, real vaqt rejimida yurak ritmi monitoring, qondagi kislorod miqdorini nazorat qilish yoki uyquni kuzatish kabi standart imkoniyatlar ham bor. Smart-soatlar 60 turdagi sport rejimlariga ega, jumladan, basketbol, futbol, tennis, yugurish, yurish va hokazo. Shuningdek, ular telefonga kelgan qo‘ng‘iroqlar va xabarlarni ko‘rsata oladi.
Standart bo‘lmagan funksiyalari orasida ko‘ngilochar o‘yinlarni keltirish mumkin, masalan, Flappy Bird Clone va 2048. Ularni smartfonga ulanmasdan turib o‘ynash mumkin. Ishlab chiqaruvchining ta’kidlashicha, Fire-Boltt Ninja 3 bir marta quvvatlanish orqali 7 kun ishlay oladi. U suvdan qo‘rqmaydi — IP68 standarti bo‘yicha sertifikatlangan.
Devays 18-maydan boshlab Hindistonda 17 999 rupiy (231 dollar) qiymatida sotuvga chiqqan. Keyinroq ular onlayn-maydonchalar orqali ham sotiladi.
Avvalroq Poco kompaniyasi o‘zining birinchi “aqlli” soati va geymerlar uchun Buds Pro naushniklarini taqdim etgani to‘g‘risida xabar berilgandi.
Izoh (0)