Kino dunyosida bir nechta filmda birga rol o‘ynagan aktyor juftliklari kam uchraydi. Hatto kadr ortida ham bunday juftliklar ko‘pincha do‘stona munosabatlarni saqlab, birga vaqt o‘tkazishadi. Eng mashhur beshta kino juftligini va ular birga rol o‘ynagan filmlarni eslaymiz.
Kristen Styuart va Jessi Ayzenberg
“Zulmat ostonasidagi muhabbat” filmining yetarlicha baholanmagan yulduzi Kristen Styuart va ikki karra “Oskar” mukofotiga nomzod Jessi Ayzenberg Gollivud dunyosining ikki “autsayder”idir.
Ular dunyoviy ziyofatlarni chetlab o‘tishga harakat qilishadi va shaxsiy hayotlari haqida gapirishga odatlanmaganlar, hamkasblari esa ularni ko‘pincha g‘alati deb hisoblashadi. Ehtimol, fe’l-atvorlaridagi shu o‘xshashlik sababli ular chiqishib ketgandir. Ayzenberg va Styuart shu kungacha uchta filmda birga rol o‘ynashgan.
Birinchi marta ular 2007-yilda “Madaniyat va istirohat bog‘i” deb nomlangan samimiy komediya melodramasida uchrashishgan. 2015-yilda “Ultraamerikaliklar” nomli absurd otishmalar va jangari komediya uslubidagi yoqimli kartinada, bir yil o‘tgach esa “Kiborlar hayoti” melodramasida birga rol o‘ynashdi. Rejissyor Vudi Allenning asarini Styuart va Ayzenbergning eng yaxshi filmi deb hisoblash mumkin. Kino tanqidchilari bu yengil, ammo bir jihatdan fojiali muhabbat tarixini yuqori baholadilar.
Al Pachino va Robert De Niro
Ikki kino afsonasi — Robert De Niro va Al Pachino — 50-yildan ortiq vaqt davomida do‘stlashib kelmoqda. Ular Nyu Yorkning qo‘shni tumanlarida o‘sgan va bolaligidan hayotga bir xil qarashgan. Birinchi marta aktyorlar olamshumul trilogiya “Cho‘qintirgan ota” ning bir qismida uchrashishgan. Ikkinchi filmda De Niro yosh Vito Korleone — Maykl Korleonening otasi rolini o‘ynagan, bu rolni Al Pachino ijro etgan.
1995-yilda Al Pachino, Robert De Niro va Vel Kilmer ishtirokidagi o‘tgan asr oxirida suratga olingan mashxur jangari filmlardan biri “Tortishuv” ekranlarga chiqdi.
Eski do‘stlar 2008-yilda “O‘ldirish huquqi” nomli kriminal trillerida va 2019-yilda Martin Skorsezening deyarli to‘rt soatlik filmi “Irlandiyalik” dramasida rol o‘ynashgan. Film “Oskar” mukofotining 10 ta va “Oltin globus”ning 5 ta nominatsiyaga loyiq deb topilgan. 70 yoshli aktyorlarning yuzlarini yoshartirish uchun Skorseze qimmatbaho kompyuter texnologiyasidan foydalangan.
Tom Kruz va Nikol Kidman
Yulduzli juftlik Tom Kruz va Nikol Kidman Toni Skottning “Momaqaldiroq kunlari” sport dramasini suratga olishga tayyorgarlik paytida tanishishgan. O‘sha yillarda Kruz allaqachon mashhurlik cho‘qqisida, Kidman esa ijodkorlik faoliyatini boshlagan edi.
1992-yilda juftlik “Uzoq-uzoqda” nomli sarguzasht melodramasida rol o‘ynagan, 7-yildan keyin esa Tom Kruz va Nikol Kidman ijrosida eng mashhur film — Stenli Kubrikning “Ko‘zlarini katta-katta yumib” trilleri katta ekranlarga chiqdi. Filmda ular ajrashish arafasidagi juftlik rolini o‘ynaganlar. Bu filmdagi suratga olish ishlari ikki kino yulduzi munosabatlarining oxiri bo‘ldi, 2001-yilda Tom Kruz va Nikol Kidman ajrashishdi.
Jonni Depp va Helena Bonem Karter
Jonni Depp va Helena Bonem Karter juftligini ushbu beshlikdagi aktyor duetlarining rekordchisi deb atash mumkin. Ular birgalikda beshta filmda rol o‘ynaganlar. Birinchi marta aktyorlar “Charli va shokolad fabrikasi” filmida birgalikda ishlaganlar. Rejissyor Tim Byorton ularning kadrdagi o‘zaro uyg‘unligini juda yoqtirganidan, ikki yildan so‘ng yana ular bilan “Suini Todd, Flit-stritlik sartarosh” filmini suratga oldi. Bir muncha vaqt o‘tgach, duet uning “Alisa mo‘jizalar mamlakatida” va “Qorong‘u soyalar” filmlarida paydo bo‘lgan. Oxirgi marta ular birgalikda “Yolg‘iz reynjer” filmida rol o‘ynaganlar.
Hayotda aktyorlar do‘st, lekin doimo romantik munosabatlar haqidagi mish-mishlarni rad etishga majbur bo‘ladilar. Xususan, Jonni Depp va aktrisa Ember Xerd o‘rtasidagi sud jarayoni butun dunyoga tarqalganda, Helena Bonem Karter o‘zining filmdagi sherigini himoya qilib, unga qarshi “bekor qilish madaniyatini” tanqid qilgan.
Jennifer Lourens va Bredli Kuper
Gollivud aktyorlari Bredli Kuper va Jennifer Lourensni ham birgalikda suratga tushish bo‘yicha “veteranlar” deb atash mumkin. Ularning birinchi “Mening yigitim — psix!” filmi garchi aktrisa “Eng yaxshi ayol roli” nominatsiyasida “Oskar”ni olgan bo‘lsa ham tanqidchilar tomonidan o‘rtacha baholandi. Tomoshabinlar rejissyor Devid O. Rassellning melodramasini yaxshiroq qabul qilishdi.
2013-yilda aktyorlar yana “Amerikacha hiyla” dramasida birga suratga tushib, uchta “Oltin globus” mukofotiga sazovor bo‘lishdi. 2014-yilda Lourens va Kuper yana bosh rollarni birgalikda ijro etgan “Serena” melodramasi chiqdi. Ularning ijodiy faoliyatidagi oxirgi film “Joy” dramasi hisoblanadi.
Izoh (0)