Xitoy hukumati mamlakatda Amerika filmlarini namoyish qilishni taqiqlashi mumkin. Bunga AQSH tomonidan joriy etilgan import bojlari sabab bo‘lmoqda.
Xitoylik ikki mashhur bloger ehtimoliy javob sanksiyalari ro‘yxati bilan bo‘lishdi, ulardan biri partiya sobiq rahbarining o‘g‘li hisoblanadi. Ro‘yxatga ko‘ra, AQSH filmlarining import qilinishi qisman yoki to‘liq to‘xtatilishi mumkin. Bu choralar haqiqatan ham joriy etiladimi, yo‘qmi — hozircha noma’lum.
Xitoy kinematografiya mahsulotlari bo‘yicha AQSHdan keyin dunyoda ikkinchi o‘rinda turadi. 2025-yilda mamlakat ekranlarida “Uddalab bo‘lmas topshiriq: yakuniy jazo”, “Supermen” kabi yirik Gollivud filmlarining namoyishi kutilmoqda. Hozirda esa Xitoy kinoteatrlarida “Maynkraft: kino” filmi namoyish etilmoqda. Mazkur film o‘tgan hafta reytinglari bo‘yicha eng kassabop loyiha sifatida birinchi o‘rinni egallab turibdi.
AQSH prezidenti Donald Tramp Xitoydan import qilinadigan mahsulotlarga 50 foizlik qo‘shimcha boj joriy qilish bilan tahdid qilgan edi. Xitoy Savdo vazirligi ma’lumotlariga ko‘ra, mamlakat AQSH shartlarini shunchaki qabul qilmaydi. Bu taqiqdan birinchi navbatda Gollivud filmlarini tomosha qiluvchi oddiy Xitoy fuqarolari jabr ko‘radi. Qolaversa, bunday siyosat Amerika kinosining Xitoyda daromad topishiga to‘sqinlik qiladi va ularning umumiy kassa yig‘imlariga jiddiy zarar yetkazadi.
Izoh (0)