“Ipak yo‘li durdonasi” XV Toshkent xalqaro kinofestivali doirasida Gollivud yulduzi Kevin Speysi ishtirokida master-klass bo‘lib o‘tdi.
Speysi zamonamizning mashhur aktyorlaridan biri. U “Amerikacha go‘zallik” filmidagi roli uchun, shuningdek, “Gumondor shaxs” filmi uchun “Oskar” mukofotini qo‘lga kiritgan.
Kevin Speysi, shuningdek, AQSH aktyorlari gildiyasi, BAFTA, Oltin globus va Toni mukofotlari bilan taqdirlangan. Uning “House of cards”, “Ka-Peks sayyorasi”, “Los-Anjeles siri”, “Muzokarachi”, “Devid Geylning hayoti”, “Yetti” va eng yaxshi kinolari qatoriga kiradi.
Kevin Speysining festivalga tashrifi shov-shuvga sabab bo‘ldi; Rennesans Kino uyi zali liq to‘ldi va yig‘ilganlarning deyarli hammasi unga savol berishni istagida bo‘lishdi. Biroq vaqt cheklangani sababli barcha savollarga javob olish imkoniyati bo‘lmadi.
Uchrashuv maksimal darajada ochiq o‘tdi, Kevin barcha savollarga batafsil javob berdi. Muayyan “yulduzlik” tuyg‘usi bir zumda g‘oyib bo‘ldi, tomoshabinlar qarshisida bir vaqtlar qiyin yo‘lni bosib o‘tgan va aktyor bo‘lishga qaror qilgan oddiy odam turardi.
Master-klass yakuniga yetgach zaldagi tomoshabinlardan biri hayajon bilan o‘z fikrlarini bildirib o‘tdi:
“U aqlbovar qilmaydigan xarizmaga ega professional ekan. U jamoat oldida o‘zini qanday tutishni, nima deyishni aniq biladi va shu bilan birga boshqa odamlar bilan xushmuomala va hurmat bilan munosabatda bo‘ldi. Shu bilan birga, u hazil qilishni ham yaxshi eplar ekan va bu borada o‘zini suvda suzgan o‘rdakdek his qildi. Uchrashuvdan keyin menda faqat yaxshi taassurotlar qoldi”.
Quyida Kevin Speysi bilan uchrashuvda berilgan eng esda qolarli savollar va ularga berilgan javoblar e’tiboringizga havola etiladi.
– Men yosh rejissorman, kuchli kino xarakterini yaratishda yosh avlodga qanday maslahat bera olasiz?
—Hammasi rejissyorning tomoshabinga nimani ko‘rsatmoqchi ekanligini, tomoshabinga qanday maʼlumotni yetkazmoqchi ekanligingizni tushunishidan boshlanadi. Yuqori sifatli film suratga olish va muvaffaqiyatga erishish uchun barcha jamoa aʼzolarini yig‘ish va muallifning film haqidagi g‘oyasini muhokama qilish kifoya. Rejissyorning vazifasi - butun sahnani xuddi kartina kabi ko‘rish, aktyorlar esa rejissyor suratidagi ranglardir. Palitrani yaratish va unga turlicha jilo bilan boyitish - bu yuksak sanʼat.
– Kino sohasidagi talabalarga qanday maslahat bera olasiz?
— Mamlakatingiz boy kinematografiya tarixiga ega, shuning uchun siz uni ko‘proq o‘rganishingiz va amaliyotga tatbiq qilishingiz kerak. Har doim o‘qing, iloji boricha ko‘proq filmlarni tomosha qiling, chunki ular sizning kelajakdagi karyerangiz uchun juda qiziqarli va foydalidir.
— Qanday qilib hozirgi darajaga erishdingiz?
— Bolaligimda ko‘p qiyinchiliklarga duch kelganman. Biroq, men xatolardan saboq oldim, kino kurslari va teatrlarda qatnashdim. Filmlarda turli rollarni o‘ynaganimdan so‘ng, aktyorlik baxtini his qildim va turli obrazlarni o‘ynashga ilhom oldim. Bu menga hayotdagi turli muammolarni yengishda katta yordam berdi.
– O‘zbekistonlik qiz amerikalik yirik prodyuserlarning eʼtiboriga tushishi uchun nima qilishi kerak?
— Men oddiy oilada ulg‘aygan, cho‘qqilarni zabt etgan insonman. Men professional aktyor bo‘lishimga juda ishonardim va aktyor bo‘lish uchun ko‘p o‘qidim. Shuning uchun, siz ham bunga ishonishingiz va o‘z ustingizda qattiq ishlashingiz kerak.
— Siz ham jahon kinosining boshqa yulduzlari, jumladan Bred Pitt, Al Pachino, Robert De Niro kabi zamonamizning eng yaxshi aktyorlaridan birisiz. Bizga yaqin va o‘rta suratlarda kamera qarshisida qanday turishni aytib bera olasizmi yoki ko‘rsata olasizmi?
— Qiziq savol. Har bir aktyor rol o‘ynayotganda qanday harakat qilsa, yaxshi bo‘lishini o‘zi hal qilishi kerak, kimgadir o‘xshashga harakat qilish noto‘g‘ri. Yillar davomida bu tajriba aktyorning o‘zida shakllanadi. Chunki har bir aktyorning o‘z uslubi, o‘ziga xosligi bo‘lishi kerak. Buni boshqa birovdan o‘rganmasligi kerak. Aktyorlikdagi eng muhimi, rejissyor maʼlum bir filmda sizdan nimani xohlayotganini tushunishga eʼtibor berish va unga tezda javob qaytarishdir.
Izoh (0)