Farzandlarining aktyor bo‘lishini xohlamaydigan Gollivud yulduzlari

Mashhurlikning badali ham bor. Quyidagi Gollivud yulduzlari farzandlari ularning izlaridan borib, aktyor bo‘lishini xohlaydimi?

Jeyson Mamoa

Jeyson Momoa mashhur aktyor bo‘lish uchun ancha mushkul yo‘lni bosib o‘tgan. U “Malibu qutqaruvchilari” serialida rol ijro etib, 10 yildan so‘ng “Taxtlar o‘yini”ning birinchi mavsumida suratga tushadi. Ammo keyinchalik ishsizlik sabab bir necha yil qashshoqlikda kun kechiradi. Jeyson faqat “Akvamen” filmida bosh rolni ijro etgach, yana shuhrat qozonadi.

Farzandlari haqida gap ketganda, ularning ikkovi ham aktyor bo‘lishni istashlarini aytadi. Jeyson kino va teatr bilan bog‘liq barcha narsani sevishini tan oladi, ammo u kinematograf boshqa ko‘plarni sindirgani kabi bolalarini ham sindirib qo‘yishidan xavotirda ekanini yashirmaydi.

Ben Afflek

Garchi ko‘pchilik Ben Afflekni “Zakovatli Uill Xanting”, “Hisob-kitob”, “Yo‘qolgan ayol” kabi filmlari orqali tanisa-da, kinoda suratga tushishi 90-yillar oxiridagi birinchi shov-shuvli filmlaridan ancha oldin boshlangan. Ben o‘smirlik chog‘idayoq filmlarda suratga tusha boshlagan va aynan o‘sha paytda Mett Deymon bilan tanishgan. Bu do‘stlik ikkalasi uchun ham hal qiluvchi ahamiyatga ega bo‘ldi, chunki bir necha yil o‘tgach, ular “Zakovatli Uill Xanting” ssenariysini yozishadi, unda bosh rollarni ijro etib, butun dunyoga mashhur bo‘lishadi.

Biroq Ben boshqalarning hayoti qanday izdan chiqib ketganini ko‘rgan va shu sababli farzandlarining uning izidan borishini istamaydi. Afflekning aytishicha, kino unga tajriba berib, voyaga yetkazdi, lekin u baribir farzandlariga buni ravo ko‘rmaydi. Uningcha, ular bola bo‘lib qolishlari kerak, chunki katta bo‘lishga hali ko‘p vaqtlari bor. Shunday bo‘lsa-da, Ben agar bolalari 18 yoshdan so‘ng aktyor bo‘lishni istasa yoki bunga urinib ko‘rishsa, ularni qo‘llab-quvvatlashga tayyor.

Mila Kunis

Mila Kunisning deyarli bolaligi bo‘lmagan, chunki u juda yoshligida AQShga ko‘chib o‘tgan va kinoda ishlashni boshlagan. U shunchalik mashhur bo‘lishni xohlaganki, “70-yillar shousi” seriali ijodkorlarini aldagan — ular qizni 17 yoshda deb o‘ylagan, aslida Mila atigi 14 yoshda edi. O‘shandan beri u karyerasida tanaffus qilmadi.

Kunis farzandlarining kelajagi haqida fikr yuritib, ularga o‘z yo‘lidan borishni taqiqlamasligini, ammo bunday bo‘lmasligiga va ular baxtli bolalikni boshdan kechirib, keyin hayotlarini kameralardan uzoqda qurishiga chin dildan umid qilishini aytadi.

Anjelina Joli va Bred Pitt

Joli “Lara Kroft: sag‘ana o‘g‘risi”, “Malefisenta”, “Janob Smit va Smit xonim” kabi filmlarda suratga tushgan bo‘lsa, Pitt “Troya”, “Tanishing, Jo Blek”, “Jang klubi”, “Bir paytlar Gollivudda” va “Yetti” filmlarida rol ijro etgan. Ularning kinoda deyarli hech qanday muammolari bo‘lmagan bo‘lsa-da, farzandlarining aktyor bo‘lishi ehtimolini doimo salbiy baholashgan.

2014-yildayoq Joli Pitt bilan bu haqda mulohaza yuritganini va bolalariga shunchalik ko‘p qiziqarli narsalarni ko‘rsatish kerakki, ular bir narsani tushunib yetsinlar degan xulosaga kelganini aytgandi — kino olamidan tashqarida ham qiziqarli narsalar ko‘p, aktyorlik esa katta va o‘zgacha zavq beruvchi narsa emas. Biroq Joli va Pitt bolalarini hech qachon kameralardan uzoqlashtirmagan. Ular ko‘pincha filmlari premyeralarida birga qatnashgan, ota-onasiga juda o‘xshash Shaylo Joli-Pitt esa hatto kichik yulduzga aylangan.

Deniel Redkliff

Deniel Redkliff aktyorlik faoliyati haqida turli his-tuyg‘ularga ega. Bir tomondan, u 20 yildan keyin ham butun dunyo bo‘ylab millionlab muxlislari bor sehrli filmlar turkumining asosiy qahramoniga aylandi. Biroq boshqa tomondan, uning to‘laqonli bolaligi bo‘lmagan. Deyarli barcha vaqtini suratga olish maydonchalarida o‘tkazgan, hattoki uy vazifasini ham Xogvarts qasrining katta zalida o‘tirib bajargan, do‘stlari esa asosan hamkasblari bo‘lgan.

Biroq Redkliff kino va farzandlari o‘rtasida to‘siq qo‘yishni istamaydi. Deniel bir kun kelib ularni suratga olish maydonchalariga olib borishni, sahna ortidagi go‘zalliklarni ko‘rsatishni va u yerda amalga oshirilayotgan ishlarga muhabbat uyg‘otishni xohlaydi. Lekin shu bilan birga, u farzandlarining mashhur aktyor hayotining har bir daqiqasini kuzatib boradigan bezovta qiluvchi suratchilar ta’qibisiz bir qadam ham yura olmaydigan mashhur insonlarga aylanishini istamaydi.

Jessika Alba

Jessika Albaning shuhrati cho‘qqisi 2000-yillarga to‘g‘ri keladi. O‘sha paytda “Fantastik to‘rtlik”, “Yoqimtoy”, “Jannatga marhamat” va “Qora farishta” filmlari ekranlarga chiqdi. Biroq Jessika bolalar aktrisasi ham bo‘lgan, chunki u 1994-yildanoq suratga tusha boshlagandi.

Alba yosh paytidagi ish tajribasi unga ta’sir ko‘rsatganini tan olib, bu tajribani farzandlariga ravo ko‘rmasligini aytadi. Jessikaning fikricha, avvalo ularning voyaga yetishi, so‘ngra kollejni tugatishi va shundan keyingina aktyorlik yoki boshqa kasb tanlash haqida qaror qabul qilishlari kerak. Shu bilan birga, Jessika farzandlari kino sohasidan chetda qolishlariga umid qiladi.