2015-yilda aktyor Jonni Depp bilan turmush qurgan, ammo bir yil o‘tib, katta mojarolar bilan ajrashgan Ember Hyord yana bir bor ona bo‘ldi: aktrisa egizak farzandlarni dunyoga keltirdi.
“Akvamen” yulduzi 2025-yil xalqaro Onalar kunida ushbu quvonchli xabar bilan ijtimoiy tarmoqlarda bo‘lishdi. U qiziga Agnes va o‘g‘liga Oushen deb ism qo‘ydi. Endilikda 38 yoshli aktrisaning uch nafar farzandi bor.
Ember egizaklarining tug‘ilgani haqida shaxsiy blogida ham xabar berdi. Unda aktrisa yangi tug‘ilgan egizaklar va katta qizi Una bilan tushgan ajoyib suratni e’lon qildi. Foto ostida u o‘zining hayotidagi eng baxtli damlardan birini boshdan kechirayotganini yozib qoldirdi:
“2025-yilgi Onalar kuni men uchun unutilmas bo‘lib qoladi. Bu yili baxtdan to‘lib ketdim va orzu qilgan oilamni nihoyat to‘liq qura oldim. Bugun quvonch bilan xabar beraman: Hyordlar oilasiga egizaklar keldi. Qizim Agnes va o‘g‘lim Oushen qo‘llarimni ham, yuragimni ham to‘lqinlantirib yubordi. To‘rt yil oldin birinchi qizim Una tug‘ilganida hayotim butunlay o‘zgargandi. O‘shanda bundan baxtliroq bo‘lishni tasavvur qila olmagan edim. Ammo endi uch karra baxtliman!
Ona bo‘lish qarorini o‘zim, sharoitlarga va bepushtlik muammolariga qaramay qabul qilishim — hayotimdagi eng muhim va eng nozik tajriba bo‘ldi. Bu tanlovni ongli va to‘liq mas’uliyat bilan amalga oshira olganim uchun falakdan cheksiz minnatdorman. Qayerda bo‘lishingizdan qat’i nazar, qanday yo‘ldan o‘tgan bo‘lsangiz ham, siz aziz onalar bilan birga bu kunni nishonlaymiz”.
Hyord farzandlarining otasi kimligi avvalgidek sir tutilmoqda. Shuningdek, u bolalarni o‘zi dunyoga keltirdimi yoki to‘ng‘ich qizi Una kabi yana surrogat ona xizmatiga murojaat qildimi, bu haqda ham aniqlik kiritilmagan. Aktrisaning o‘zi esa hozircha tafsilotlarni izohlamadi.
Ma’lumot uchun, Ember Hyordning to‘ng‘ich farzandi Una Peyj 2021-yil 8-aprelda tug‘ilgan. Ammo aktrisa bu haqda ommaga faqat uch oy o‘tib ma’lum qilgan. Aktyor Jonni Depp bilan shov-shuvli ajrimdan so‘ng aktrisa hayot tarzini tubdan o‘zgartirdi: u AQSHdan ko‘chib ketdi va Ispaniyada yashay boshladi. U yerda shaxsiy hayotidan zavqlanib, Gollivud shovqinidan uzoqda qoldi. Hozirda Ember butun e’tiborini onalik burchiga qaratgan va shaxsiy hayotini ommadan yiroqda saqlashga harakat qilmoqda.
Izoh (0)