Joriy yilning iyun oyida to‘rtinchi bor ota bo‘lgan 83 yoshli Al Pachino sentyabr oyiga kelib 29 yoshli rafiqasi Nur Alfalla bilan ajrashishga qaror qilgan edi. Sobiq juftlik yaqindagina aliment masalasida shartnoma tuzishgan.
Unga ko‘ra, Al Pachino kenja farzandiga 110 000 dollar miqdorida avans va har oy 30 000 dollardan aliment to‘laydi. Bundan tashqari, har yili taʼlim fondi uchun 15 000 dollar ajratadi va yil so‘ngida daromad ko‘rsatkichidan qatʼiy nazar qo‘shimcha 90 000 dollar beradi. Bola uchun vasiylikni Nur Alfalla oladi, aktyor esa farzandi bilan uchrashib turish imkoniyatiga ega bo‘ladi.
Nur Alfallaning farzand kutayotgani haqidagi xabar nafaqat muxlislar, balki aktyorning o‘zi uchun ham kutilmagan yangilik bo‘lgan edi. G‘arb nashrlariga ko‘ra, salomatligidagi muammolar tufayli 83 yoshda ota bo‘la olishiga o‘zi ham ishonmagan aktyor Alfalladan DNK tekshiruvi o‘tkazilishini talab qilgan. Tekshiruv natijasida bolaning otasi Al Pachino ekani tasdiqlangan.
Gollivud aktyorining Nur Alfalla dunyoga keltirgan o‘g‘lidan tashqari yana 3 nafar farzandi bor. Ijodkorning to‘ng‘ich qizi Juliya Mariya ayni vaqtda 33, egizaklari Anton Jeyms Pachino va Oliviya Rouz Pachinolar 22 yoshda.
Izoh (0)