Hech kim Ukrainani taslim bo‘lishga majbur qila olmaydi, deb yozadi Ukraina tashqi ishlar vaziri Andrey Sibiga X ijtimoiy tarmog‘ida.
Uning ta’kidlashicha, Ukraina Yevropa zamonaviy tarixidagi eng dahshatli harbiy hujumga va uch yillik to‘liq urushga bardosh bergan.
Ukraina xalqi va uning prezidenti Vladimir Zelenskiy Putinning bosimiga bo‘ysunishni rad etdi. Hech kim Ukrainani taslim bo‘lishga majburlay olmaydi. Biz o‘z mavjudlik huquqimizni himoya qilishda davom etamiz, deya ta’kidladi Sibiga.
Tramp Zelenskiyni “saylovsiz diktator” deb atadi
Saylovsiz diktator. Zelenskiy tezroq harakat qilishi kerak, aks holda uning mamlakati butkul tamom bo‘ladi. Biz Rossiya bilan urushni tugatish bo‘yicha muzokaralarni muvaffaqiyatli olib bormoqdamiz. Buni faqat Tramp va uning ma’muriyati uddalay olishini barcha e’tirof etdi, deydi AQSH yetakchisi.
U “Ukrainani yaxshi ko‘rishi, biroq Zelenskiy juda yomon ish qilgani sababli uning mamlakati vayron bo‘lgani va millionlab odamlar sababsiz halok bo‘lgani”ni qo‘shimcha qildi.
Trampning ta’kidlashicha, Zelenskiy AQSHni “hech qachon boshlanmasligi kerak bo‘lgan, g‘alaba qozonib bo‘lmaydigan urush uchun” 350 milliard dollar ajratishga ko‘ndira olgan. Ukraina prezidenti Vashington Kiyevga go‘yoki 500 milliard dollarlik yordam bergani haqidagi ma’lumotlar haqiqatga to‘g‘ri kelmasligini aytdi.
Bundan tashqari, Germaniya kansleri Olaf Shols ham bunga munosabat bildirdi.
Prezident Zelenskiyning demokratik legitimligi yo‘q, deb aytish shunchaki xato va xavflidir. Haqiqat shundaki, Zelenskiy Ukraina davlatining qonuniy saylangan rahbaridir. Urush sharoitida tegishli saylovlar o‘tkazish imkonsizligi Ukraina konstitutsiyasi va saylov qonunlariga to‘liq mos keladi. Hech kim buning aksini ta’kidlashga haqli emas, dedi Shols.
U aynan Vladimir Putin boshchiligidagi Rossiya Ukrainaga qarshi urush boshlaganini eslatdi.
Ukraina deyarli uch yildan beri Rossiyaning shafqatsiz tajovuzidan himoyalanmoqda. Har kuni, dedi kansler.
Trampning Zelenskiy haqidagi fikrlarini Germaniya tashqi ishlar vaziri Annalena Berbok va federal iqtisodiyot vaziri, vitse-kansler Robert Xabek ham tanqid qildi.
Agar ijtimoiy tarmoqlarda shoshilinch post yozish o‘rniga haqiqiy dunyoga e’tibor qaratilsa, Yevropada kimlar, afsuski, diktatura sharoitida yashashga majbur ekani aniq bo‘ladi: bu Rossiyadagi va Belarusdagi odamlardir.
Ukrainaliklar har kuni o‘zlarining erkin demokratiyasi uchun kurashmoqda va biz yevropaliklar sifatida demokratik davlatlarimizni birgalikda mustahkamlash uchun ularni Yevropa ittifoqiga olib boradigan yo‘lda qo‘llab-quvvatlaymiz, dedi Berbok.
AQSH prezidentining bayonoti hayratga soladi. Bu voqelikni misli ko‘rilmagan tarzda buzib ko‘rsatish va o‘ta xavfli ritorika. Haqiqat shundaki, diktator Putin demokratik Ukrainaga hujum qildi, deb yozdi Robert Xabek o‘zining X ijtimoiy tarmog‘ida.
Izoh (0)