Yaqin haftalarda YI Ukrainaga qurol-yarog‘ va o‘q-dori xaridi uchun 900 million yevro (taxminan 1 milliard dollar) ajratadi. Bu haqda Kiyevda bo‘lib o‘tgan Ukraina–Yevropa mudofaa sanoati forumida YI tashqi ishlar xizmati bosh kotibi o‘rinbosari Sharl Friss ma’lum qildi.
Frissning so‘zlariga ko‘ra, yordam paketi Rossiyaning muzlatilgan aktivlaridan olingan daromadlar hisobidan moliyalashtiriladi.
“Shu tarzda Yevropa Ittifoqining Ukrainaga va uning mudofaa sanoatiga ko‘rsatgan yordami jami 3,3 milliard yevroga (3,7 milliard dollar) yetkazildi,” dedi u.
U, shunindek, tomonlar o‘tgan hafta Lvovda bir qator shartnomalar imzolaganini, dronlar va raketa ishlab chiqarish kabi ilg‘or sohalarga investitsiya kiritilishini ma’lum qildi.
Muzlatilgan Rossiya aktivlari
Rus armiyasining Ukrainaga keng ko‘lamli bosqinidan so‘ng G‘arb davlatlari Rossiya Markaziy bankiga tegishli 300 milliard dollarga yaqin aktivlarni muzlatib qo‘ydi. Aksariyat mablag‘lar Yevropa Ittifoqida, ayniqsa Belgiya markazidagi Euroclear kliring markazida saqlanmoqda. Qolgan aktivlar AQSH, Yaponiya va G7 mamlakatlari tasarrufida qolyapti.
Bu aktivlarga nisbatan taqiq hozircha yechilmagan. G7 vakillari Rossiya Ukrainaga yetkazgan zararini qoplamaguncha cheklovlar o‘z kuchida qolishini bir necha bor ta’kidlagan.
Ayni vaqtda YI bu kabi aktivlardan kelayotgan daromadni Ukrainaga yordam sifatida yo‘naltira boshlagan. Yaqinda Ukraina bosh vaziri Denis Shmigal Yaponiya ham Rossiya aktivlari hisobidan Ukrainaga 3 milliard dollar ajratishini e’lon qildi.
Izoh (0)