Ukraina prezidenti Vladimir Zelenskiy 15-may kuni Istanbulda bo‘lib o‘tadigan tinchlik muzokaralarida faqat Rossiya prezidenti Vladimir Putin bilan uchrashadi. Rossiyaning boshqa hech bir vakili bilan muzokaralar bo‘lmaydi. Bu haqda Ukraina prezidenti ofisi rahbari maslahatchisi Mixail Podolyak ma’lum qildi.
Podolyakdan agar Rossiya prezidenti muzokaralarga kelmasa, Zelenskiy qanday yo‘l tutishi haqida so‘raldi. Bunga javoban siyosatchi Ukraina quyi darajadagi muzokaralarni foydasiz deb hisoblashini aytdi.
Biz Rossiyadagi hokimiyat tuzilishini tushunamiz. Medinskiy u yoqda tursin, hatto Lavrov ham Putinning g‘oyasi bo‘lgan u yoki bu qarorlarni qabul qilish vakolatiga ega emas. Ya’ni urushni davom ettirish yoki to‘xtatish haqida faqat Putin qaror qabul qilishi mumkin, dedi Podolyak.
U Istanbuldagi muzokaralar jarayonining tuzilishi aniq ekanini ma’lum qildi.
Ukraina va Rossiya tomonidan qaror qabul qiladigan odam bor. Boshqa hamma narsa — natijasiz rasmiy ishtirok. Uchrashuvni quyi darajada o‘tkazishdan ma’no nima?, dedi Zelenskiy ofisi rahbari maslahatchisi.
Ukraina va Rossiya o‘rtasidagi muzokaralar
2022-yilda Rossiya va Ukraina o‘rtasidagi mojaro boshlanganidan beri tomonlar uni hal qilishga bir necha bor urinib ko‘rdi. Muzokaralarning dastlabki uch raundi Belarusda — 28-fevral kuni Gomelda, 3 va 7-mart kunlari Brestda bo‘lib o‘tdi, biroq asosiy masalalar bo‘yicha kelishib bo‘lmadi.
2022-yil 10-mart kuni Antaliyadagi Dipforum doirasida Rossiya va Ukraina Tashqi ishlar vazirlari o‘rtasida uchrashuv bo‘lib o‘tdi, biroq u oldinga siljish olib kelmadi.
29-mart kuni Istanbuldagi Dolmabaxche saroyida bo‘lib o‘tgan uchrashuv yanada ahamiyatli bo‘ldi. Unda Ukraina delegatsiyasi Rossiya tomoniga ehtimoliy kelishuv loyihasi va kafolat beruvchi davlatlar ro‘yxatini taqdim etdi. Biroq 17-may kuni Ukraina muzokaralarni rasman to‘xtatdi. 4-oktyabr kuni Ukraina prezidenti Vladimir Zelenskiy Rossiya prezidenti Vladimir Putin bilan muloqot qila olmaslik to‘g‘risidagi MXX qarorini imzoladi.
Diplomatik boshi berk ko‘chaga kirib qolganiga qaramay, 2022-yil 22-iyul kuni Istanbulda BMT va Turkiya vositachiligida Qora dengiz don tashabbusi bo‘yicha kelishuvga erishildi.
18-mart kuni AQSH prezidenti Donald Tramp va Rossiya prezidenti Putin o‘rtasidagi telefon suhbatidan so‘ng Rossiya tomoni energetika infratuzilmasiga zarbalardan o‘zaro voz kechish g‘oyasini qo‘llab-quvvatladi, ertasi kuni prezident Zelenskiy xuddi shunday choralarga rozilik berdi.
2025-yil 11-mayga o‘tar kechasi prezident Putin bayonot berib, Istanbulda Ukraina bilan oldindan hech qanday shart qo‘ymasdan to‘g‘ridan-to‘g‘ri muzokaralar o‘tkazishni taklif qildi. Turkiya prezidenti Rajab Toyyib Erdo‘g‘on uchrashuvni tashkil etishga tayyorligini bildirdi.
Tramp rossiyalik hamkasbining Ukraina bilan to‘g‘ridan-to‘g‘ri muzokaralarni qayta boshlash taklifini qo‘llab-quvvatladi. Zelenskiy esa 15-may kuni Istanbulda bo‘lib o‘tadigan muzokaralarda ishtirok etishini tasdiqladi.
Izoh (0)