Россия Федерацияси ва Украина ўртасидаги инқирозни ҳал этиш учун қабул қилинадиган қарорлар янада пухта ўйланиши лозим. Чунки вазиятнинг натижаси бутун қитъадаги дунё тартибига таъсир кўрсатади. Бу ҳақда Германиянинг янги канцлери Фридрих Мерц янги ҳукуматнинг парламентдаги илк баёнотида билдирди.
Унинг сўзларига кўра, бу можаронинг натижаси Европа ва келажак дунёсида қонун-қоидалар ўрнатилиши ёки “кучлилар омон қоладиган зўравон милитаризм” ҳукмронлик қилишини белгилайди.
“Ҳозир бутун қитъадаги дунё тартиби хавф остида”, деди у.
Мерц ўз ҳукуматининг асосий устувор вазифаси армияни мустаҳкамлаш, Европа учун эса бирлик эканини таъкидлади.
“Украинада бутун қитъамиздаги дунё тартиби хавф остида. Ушбу тарихий ва ҳал қилувчи вазиятда Европа ҳар қачонгидан ҳам бирдамроқ бўлиши шарт”, деди у.
Бундан ташқари, канцлер Германия кўплаб иқтисодий ва ижтимоий муаммоларни ўз кучи билан енгиб ўта олишига ишонч билдириб, бунинг учун кўп жиҳатдан сиёсатни ўзгартириш зарурлиги ҳақида гапирган.
“Биз ўз кучимиз билан яна дунё ҳайрат билан қарайдиган ўсиш локомотивига айланишимиз мумкин”, дея қўшимча қилди Мерц.
Россия президенти Владимир Путин 11 май кунги мурожаатида Украина билан 2022 йил баҳорида Истанбулдаги раунддан сўнг тўхтаб қолган тўғридан-тўғри музокараларни қайта бошлашни таклиф этди. Ўшанда, Россия раҳбарининг айтишича, Киев делегацияси маслаҳатлашувларда иштирок этишни тўхтатган, дастлабки келишилган битим лойиҳаси эса, Москва таъкидлаганидек, Ғарб ҳамкорларининг босими остида рад этилган.
Россия таклифига жавобан Украина президенти Владимир Зеленский ўзининг Telegram-каналида, агар ўт очиш тўхтатилса, 15 май куни шахсан Путинни Истанбулда кутишини ёзди. Унинг сўзларига кўра, ҳарбий ҳаракатларнинг “тўлиқ ва узоқ муддатли” тўхтатилиши дипломатия учун зарур асос бўлади.
Изоҳ (0)