Rossiya va AQSH Rossiya gazini Yevropaga yetkazib berishni qayta tiklash yo‘llarini maxfiy ravishda muhokama qilmoqda. Bu haqda Reuters agentligi sakkizta turli manbadan ma’lumot oldi.
Xabar qilinishicha, Rossiya prezidenti Vladimir Putinning investitsiyalar bo‘yicha vakili Kirill Dmitriyev va AQSH rahbari Donald Trampning maxsus elchisi Stiv Uitkoff Ukraina bo‘yicha tinchlik muzokaralari doirasida gaz masalasini ko‘rib chiqqan.
Ikki tomonlama muzokaralar jarayonidan xabardor manbalarning ta’kidlashicha, Rossiya gazini Yevropaga yetkazib berishning tiklanishi Rossiya va Ukraina o‘rtasida tinchlik bitimi imzolanishiga turtki bo‘lishi mumkin.
Ta’kidlanishicha, Yevropa Ittifoqi yetkazib berishning muqobil manbalarini izlayotgan bo‘lsa-da, Yevropaning ayrim davlatlari hamon Rossiya gazini xarid qilmoqda. Soha mutaxassislarining fikricha, tinchlik bitimi imzolangandan so‘ng, bunday davlatlar soni ortishi mumkin.
AQSHning gaz savdosini tiklash jarayonidagi ishtiroki Moskvaga Yevropaning ko‘p qismidagi siyosiy qarshilikni yengishga yordam beradi va Vashingtonga manfaat keltiradi. Manbalarga ko‘ra, bu Amerika rasmiylariga Rossiya gazining qanchalik miqdorda Yevropa bozoriga qaytishini nazorat qilish imkonini beradi.
Izoh (0)