Ukraina prezidenti Vladimir Zelenskiy 15-may kuni Istanbulda bo‘lib o‘tadigan tinchlik muzokaralarida Rossiya rahbari Vladimir Putin bilan nimalarni muhokama qilishini aytdi. Bu haqda Liberation xabar berdi.
Biz u bilan darhol hamma narsani kelishib ololmaymiz. Bu imkonsiz — bizning hayotga qarashlarimiz, dunyoqarashlarimiz turlicha. Ammo qanday bo‘lmasin, urushni to‘xtatish uchun yo‘l topishimiz shart. Shubhasiz, kelishib olishimiz zarur bo‘lgan masalalar bor va texnik tafsilotlarni boshqa formatda muhokama qilishimiz mumkin.
Agar Putin bilan uchrashsam, uchrashuv siyosiy g‘alaba bilan yakunlanishi lozim — o‘t ochishni to‘xtatish, “barchaga barchani” tamoyili asosida asirlarni almashish yoki shunga o‘xshash narsa. Agar u kelmasa, demak, unga siyosiy g‘alaba kerak emas — boshqa davlatlar uchun ham, deya ta’kidladi Ukraina prezidenti.
Zelenskiy urush qancha davom etishini hech kim bilmasligini qayd etdi.
Lekin o‘n yil emas. Ukraina bardosh berolmaydi... Bu hamma uchun, nafaqat do‘stlar, balki dushmanlar uchun ham qimmatga tushadi, deya xulosa qildi siyosatchi.
Rossiya prezidenti Vladimir Putin 15-may kuni Istanbulda mojaro tomonlari ishtirokida to‘g‘ridan-to‘g‘ri muzokaralar o‘tkazishni taklif qilgandi. Shundan so‘ng AQSH prezidenti Donald Tramp ukrainalik hamkasbini mazkur muzokaraga rozi bo‘lishga chaqirgandi.
Ular hech bo‘lmaganda kelishuv imkoniyatini aniqlay oladi. Agar bu imkonsiz bo‘lsa, Yevropa rahbarlari va AQSH vaziyatdan xabardor bo‘lib, tegishli choralar ko‘radi!...Men Ukrainaning Putin bilan kelishuvga borishiga shubha qila boshladim. Putin esa Amerika Qo‘shma Shtatlari yordamisiz hech qachon g‘alaba qozonishi mumkin bo‘lmagan Ikkinchi jahon urushidagi g‘alabani nishonlash bilan ovora. UCHRASHING, HOZIROQ!, deb yozgan Tramp.
Bunga javoban Ukraina prezidenti muzokaralarda shaxsan Vladimir Putinni kutishini qayd etgan. Kreml muzokaralarda qatnashadigan Rossiya delegatsiyasi tarkibini hozircha oshkor qilmayapti. Kremlning sobiq yuqori martabali amaldori 13-may kuni The Washington Post nashrida xabar berishicha, muzokaralarda Rossiya nomidan Tashqi ishlar vaziri Sergey Lavrov va Rossiya prezidenti yordamchisi Yuriy Ushakov ishtirok etadi.
Biroq Zelenskiy ofisi vakili Istanbulda Rossiya prezidentidan tashqari boshqa hech bir rus vakili bilan muzokara o‘tkazilmasligini qayd etgan.
Izoh (0)