Afg‘oniston Samarqanddagi Imom Buxoriy majmuasi qurilishi uchun 16 ta yuk mashinasida Hirot oq marmari hadya qildi. Bu haqda Surxondaryo viloyati hokimligi matbuot xizmati xabar berdi.
Ma’lum qilinishicha, 13-may kuni Termiz xalqaro savdo markazida O‘zbekiston prezidentining Afg‘oniston bo‘yicha maxsus vakili Ismatilla Ergashev, Surxondaryo viloyati hokimi Ulug‘bek Qosimov, Afg‘oniston bosh vaziri kotibiyati rahbari Mullo Abdul Vose hamda Balx viloyati gubernatori Muhammad Yusuf Vafo rahbarligidagi delegatsiyalar ishtirokida uchrashuv bo‘lib o‘tdi.
Muloqot chog‘ida ikki davlat o‘rtasidagi ko‘p qirrali hamkorlik, jumladan, savdo, transport, gumanitar va madaniy aloqalarni yanada kengaytirish masalalari muhokama qilindi. Uchrashuv yakunida Afg‘oniston tomonidan Samarqand shahrida barpo etilayotgan Imom Buxoriy majmuasi qurilishi uchun yuborilgan 16 ta yuk mashinasidagi Hirot oq marmari O‘zbekiston tomonidan qabul qilib olindi.
-DdS3rpZG.avif)
Hozir Hirot oq marmar toshidan Arabiston, Rossiya, Eron kabi davlatlarda keng foydalanilayotganini ma’lum qilinib, uning noyob xususiyatlari haqida fikr almashildi.
“Bu toshga dunyoda katta qiziqish mavjud. U issiqda isib, sovuqda sovib ketmaydi. Tozalanishi ham juda oson. O‘ziga suv yuqtirmaydi. Bugun to‘rt ming kvadrat metr hajmda marmar tosh olib keldik. Ikkinchi bosqichi ham tayyor bo‘lishi bilan O‘zbekistonga yetkaziladi”, degan Afg‘oniston TIV Balx viloyatidagi vakolatxonasi rahbari Mavlaviy Aminulloh Sodiq.
-BDHJP_5Q.avif)
-ePzWWOSG.avif)
Afg‘oniston tomoni og‘ir kunlarda O‘zbekiston ko‘rsatgan beg‘araz yordam uchun chuqur minnatdorlik bildirdi.
12-may kuni O‘zbekistondan Afg‘oniston fermerlari va agrar tuzilmalariga beg‘araz yordam tariqasida 26 tonnadan ortiq qishloq xo‘jaligi mahsulotlari urug‘lari yetkazib berilgandi.
Izoh (0)