Buyuk Britaniya ittifoqchilar bilan muhokama qilinayotgan rejalar doirasida Ukrainaga 5 yilga qo‘shin kiritish imkoniyatini ko‘rib chiqmoqda. Bu haqda The Telegraph xabar berdi.
Harbiy rahbarlar Rossiyaning navbatdagi bosqiniga yo‘l qo‘ymaslik uchun Ukraina armiyasini tayyorlashga va qayta tiklashga yordam bermoqchi. Britaniya va Fransiya tomonidan muhokama qilinayotgan variantlar orasida Ukrainaga “Yevropa boshchiligidagi kuchlarni” yuborish ham bor.
Ukraina hududiga aynan qancha harbiy joylashtirilishi noma’lum. Yevropa davlatlarining fikricha, bu dastlabki bosqichda Rossiyani tinchlik shartnomasini buzishdan saqlab qoladi. Quruqlikdagi qo‘shinlarni jo‘natishdan tashqari, Ukrainaning havo va dengiz hududini himoya qilish ham rejalashtirilmoqda. Buning uchun qanday choralar ko‘rilishiga aniqlik kiritilmagan. Qo‘shinlarni olib chiqish bosqichma-bosqich amalga oshirilishi rejalashtirilgan.
10-aprel kuni Yevropa davlatlari mudofaa vazirlari Ukrainada qo‘shinlarni joylashtirish ehtimoli bo‘yicha muzokaralar o‘tkazdi. Koalitsiya kuchlari muhim infratuzilma obyektlari xavfsizligini ta’minlashi kutilmoqda. Hozircha 30 ta davlatdan faqat oltitasi harbiylarni yuborishga rozi bo‘lgan.
Rossiya NATO davlatlari askarlarining Ukrainada joylashtirilishiga rozi bo‘lmasligini bir necha bor ta’kidlagan. Rossiya tashqi ishlar vaziri o‘rinbosari Aleksandr Grushko “Izvestiya” nashriga bergan intervyusida buni qayta tasdiqlagan. U o‘t ochish to‘xtatilganda NATO va Yevropa Ittifoqi davlatlaridan Ukrainaga tinchlikparvar kontingent yuborilishi “o‘rinsiz va bema’ni” deb hisoblanishini bildirgan.
Rossiya uchun NATO kontingentlari Ukraina hududida qanday nom ostida joylashtirilishi — Yevropa Ittifoqi, NATO yoki milliy sifatida bo‘lishi — mutlaqo ahamiyatsiz. Agar ular u yerda paydo bo‘lsa, bu ularning mojaro zonasiga joylashtirilganini va ushbu kontingentlar uchun mojaro tomoni sifatida barcha oqibatlarni keltirib chiqarishini anglatadi, degan Grushko.
Britaniya bosh vaziri Kir Starmerning vakili Rossiya tomonidan o‘t ochilgan taqdirda tinchlikparvar kontingentga o‘q uzishga ruxsat beriladimi, degan savolga shunday javob bergan:
Eslatib o‘tish joizki, Rossiya qo‘shinlarini kiritayotganda Ukrainadan so‘ramagan edi. Biz tezkor rejalashtirish bo‘yicha yig‘ilishlar o‘tkazmoqdamiz, deb qo‘shimcha qildi u.
Izoh (0)