Yevropa ittifoqi mamlakatlarida hozircha Ukraina xavfsizligini ta’minlash va Rossiyaning ehtimoliy tajovuziga qarshi turish uchun yetarlicha qurol zaxiralari yo‘q. Bu haqda Germaniyaning Rheinmetall qurol-yarog‘ kompaniyasi rahbari Armin Papperger ma’lum qildi.
Pappergerning so‘zlariga ko‘ra, bunday holat Yevropaning o‘nlab yillar davomida mudofaaga minimal mablag‘ sarflagani va tegishli xarajatlarni yalpi ichki mahsulotning 1 foizi darajasida ushlab turishni normal deb bilgani natijasidir.
Yevropaliklar va ukrainaliklarning omborlarida hech narsa yo‘q, dedi qurol-yarog‘ kompaniyasi rahbari.
U buning oqibatida AQSH Yevropa mamlakatlariga “bolalar”dek munosabatda bo‘la boshlaganini aytdi.
Agar ota-onalar kechki ovqatni tanovul qilsa, bolalar boshqa stolda o‘tirishi kerak. AQSH Rossiya bilan muzokaralar olib bormoqda va hech bir yevropalik stol atrofida o‘tirmayapti. Yevropaliklar bolalar ekani aniq bo‘ldi, deya tushuntirdi Rheinmetall rahbari.
Shu bilan birga, u AQSH prezidenti Donald Tramp Rossiyani Ukrainada “o‘t ochishni to‘xtatishga” majbur qila olishiga shubha qildi. Ammo bu holatda ham, Pappergerning so‘zlariga ko‘ra, uning kompaniyasi yutishda davom etadi, chunki Yevropa qurol ishlab chiqarishga sarmoya kiritadi.
Agar (Rossiya-Ukraina) urushi to‘xtasa ham, bizni juda tinch kelajak kutmoqda deb o‘ylash noto‘g‘ri bo‘ladi, dedi Papperger.
Financial Times ma’lumotlariga ko‘ra, 2021-yildan 2024-yilgacha bo‘lgan davrda Yevropa ittifoqi mamlakatlarining umumiy mudofaa xarajatlari 30 foizdan ko‘proqqa oshgan va 326 milliard yevroni yoki blok yalpi ichki mahsulotining taxminan 1,9 foizini tashkil etgan. Yevropa ittifoqining eng yirik iqtisodiyoti bo‘lgan Germaniya 2024-yilda yalpi ichki mahsulotining taxminan 2 foizini mudofaaga yo‘naltirdi. Shu bilan birga, Tramp NATO davlatlari mudofaaga YIMning kamida 5 foizini sarflashini talab qilgan.
Rheinmetall — Ukrainadagi urushda qo‘llanadigan 155 millimetrli artilleriya snaryadlarining eng yirik nemis ishlab chiqaruvchilaridan biri. Konsern Kiyevga tanklar, piyodalar jangovar mashinalari va boshqa texnikalarni ham yetkazib bergan. Bundan tashqari, kompaniya Ukrainada mudofaa zavodini ochgan.
NATO Rossiya hukumati Pappergerni o‘ldirishni rejalashtirganini ma’lum qilgandi. Germaniyaning Focus nashriga ko‘ra, Rossiya prezidenti Vladimir Putin 2024-yil bahorida harbiylar bilan uchrashuvda Rheinmetall rahbarini “urush provokatori” deb atagan.
Izoh (0)