Prezident Shavkat Mirziyoyev 13-may kuni seysmik xavfsizlikni kuchaytirish chora-tadbirlariga oid takliflar taqdimoti bilan tanishdi. Bu haqda Prezident matbuot xizmati xabar berdi.
Mamlakatda bunyodkorlik ko‘lami keng. 2017-yildan buyon joylarda 11 ming 410 ta ko‘p qavatli uylar qurilgan. Bu aholini turar joy bilan yetarlicha taʼminlash, turmush sharoitlarini yaxshilashga xizmat qilmoqda.
Qurilishning asoslaridan biri bo‘lgan seysmologiya sohasi ham rivojlantirilmoqda. Bu borada xorijiy ilmiy markazlar bilan hamkorlik qilib, innovatsion texnologiyalarni tatbiq etishga eʼtibor qaratilmoqda. Shu bilan birga, davlat ko‘p jabhalarda tashabbuskor hamdir.
Maʼlumki, 1966-yil 29-aprelda Toshkent shahrida vayronkor zilzila sodir bo‘lgan. O‘zbekiston prezidenti zilzila qurbonlariga hurmat ko‘rsatish va bu borada xalqaro hamkorlik zarurligini eslatish maqsadida xotira va birdamlik kunini taʼsis etish tashabbusini ilgari surgan edi. Buning eʼtirofi o‘laroq, yaqinda BMT Bosh Assambleyasi 29-aprelni Xalqaro zilzila qurbonlarini xotirlash kuni, deb eʼlon qilish to‘g‘risida rezolyutsiya qabul qildi.
Bu sohada xalqaro standartlarga mos bo‘lish uchun davlat rahbari yangi qurilayotgan uylarning sifatiga eʼtiborni kuchaytirish vazifasini qo‘ygan edi. Shunga muvofiq, ko‘p qavatli uylarning zilzilaga bardoshliligini oshirish va aholining seysmik xavfsizligini taʼminlash choralari ko‘rilmoqda.
Jumladan, davlat loyiha institutlari mutaxassislari ishtirokida joylarda o‘rganishlar o‘tkazildi. Ushbu o‘rganish natijalari va hududlarning seysmik holati tahlili asosida bu tizimni yana-da takomillashtirish bo‘yicha takliflar ishlab chiqildi.
Unga ko‘ra, xorijiy mutaxassislar jalb qilingan holda, binolarni o‘rganish bo‘yicha yangi amaliyot yo‘lga qo‘yiladi. Zilzilaga va boshqa tabiiy ofatlarga bardoshli uylarni qurish bo‘yicha tajriba almashish kengaytiriladi. Binolar instrumental texnik tekshiruvdan o‘tkazilib, kamchiliklar bartaraf etiladi.
Ushbu o‘rganishlar va xorijiy tajriba asosida, seysmik xavfni, taʼsirni va xatarni baholash yuzasidan meʼyoriy hujjatlarga o‘zgartirishlar kiritiladi.
Davlat rahbari qurilishda sifat va xavfsizlik birinchi o‘rinda ekanini taʼkidlab, bu yo‘nalishlarni ilmiy rivojlantirish, sohaga zamonaviy yondashuvlarni joriy etish bo‘yicha ko‘rsatmalar berdi.
Izoh (0)