Savdo-sanoat palatasi raisi Davron Vahobov Afg‘oniston sog‘liqni saqlash vaziri Mavlaviy Nur Jalol Jaloliy bilan uchrashuv o‘tkazdi. Bu haqda SSP matbuot xizmati xabar berdi.
Uchrashuvda ikki mamlakat o‘rtasida sog‘liqni saqlash sohasidagi hamkorlikni rivojlantirish, ayniqsa, farmatsevtika va stomatologiya yo‘nalishlarida qo‘shma loyihalarni amalga oshirish masalalari muhokama qilindi.
Jumladan, Afg‘oniston tomoni afg‘on yoshlarini o‘zbekistonlik mutaxassislar tomonidan Termiz shahrida stomatologiya yo‘nalishi bo‘yicha o‘qitishni, shuningdek, xalqaro “Termiz savdo markazi” hududida Afg‘onistondan keladigan fuqarolarga tibbiy xizmat ko‘rsatish maqsadida 20 ga yaqin stomatologiya klinikasi filiallarini ochishni taklif qildi.
Farmatsevtika sohasidagi hamkorlik bo‘yicha esa dolzarb masalalar ko‘rib chiqildi. Xususan, tadbirkorlar tomonidan Afg‘onistonda dori-darmon vositalarini ro‘yxatdan o‘tkazish muddati olti oydan bir oyga qisqartirilishi, shuningdek, bir marta import qilishga ruxsat berish tartibi joriy etish takliflari ilgari surildi. Afg‘oniston sog‘liqni saqlash vaziri ushbu tashabbuslarni qo‘llab-quvvatladi.
Ushbu sharoitlar, mahsulot sifati va raqobatbardosh narxlar bilan birgalikda, O‘zbekiston farmatsevtika kompaniyalari uchun Afg‘oniston bozoridagi ulkan salohiyatni ro‘yobga chiqarish imkonini yaratadi. 2025-yil oxirigacha eksport hajmini 50 mln dollardan oshirishga barcha asoslar mavjud.
Navro‘z bayrami hamda Ramazon hayiti munosabati bilan O‘zbekistondan afg‘on xalqiga qariyb 200 tonnadan ortiq oziq-ovqat mahsulotlari ortilgan navbatdagi insonparvarlik yordami yetkazilgan edi.
Shuningdek, o‘tgan yilning dekabr oyida prezident Shavkat Mirziyoyevning topshirig‘i bilan, Afg‘oniston aholisiga insonparvarlik yordami va “Salomatlik” poyezdi jo‘natilgandi.
Aprel oyida Surxondaryo viloyati hokimi Ulug‘bek Qosimov boshchiligidagi delegatsiya O‘zbekiston xalqi nomidan birodar afg‘on xalqiga navbatdagi insonparvarlik yordamini yetkazgan edi.
Shuningdek, 2023-yil aprelda ham O‘zbekistondan afg‘on xalqiga 185 tonnadan ortiq zaruriy oziq-ovqat mahsulotlari ortilgan navbatdagi insonparvarlik yordamini jo‘natgandi.
2022-yilda bo‘lsa zilzila oqibatida jabr ko‘rganlarga yordam ko‘rsatish maqsadida O‘zbekiston prezidenti Shavkat Mirziyoyev topshirig‘iga binoan Afg‘onistonga navbatdagi insonparvarlik yordami yuborilgan edi.
Izoh (0)