Prezident huzuridagi Davlat boshqaruvi akademiyasi Prezident huzuridagi Davlat siyosati va boshqaruvi akademiyasi etib qayta tashkil etiladi. Bu haqda “Istiqbolli kadrlarni maqsadli tayyorlash hamda ularni davlat boshqaruvi va xizmatiga samarali jalb etish tizimini yanada takomillashtirish chora-tadbirlari to‘g‘risida”gi prezident farmonida belgilandi.
Akademiyaning asosiy vazifalaridan biri etib davlat xizmatchilarining malakasini muntazam oshirib borish va qayta tayyorlash, shuningdek, boshqaruv kadrlarini magistratura va oliy ta’limdan keyingi ta’lim bosqichlarida o‘qitish belgilandi.
Farmonga ko‘ra, Prezident huzuridagi Davlat siyosati va boshqaruvi akademiyasining Vasiylik kengashi tuziladi.
2025-yil 1-iyuldan davlat organlari va tashkilotlari tomonidan davlat xizmatchilarining malakasini oshirish va qayta tayyorlash xodimlarning kasbiy rivojlanish ehtiyojlariga asoslangan holda tashkil etiladi hamda malaka oshirishning an’anaviy, muqobil va mustaqil shakllari joriy etiladi.
Farmonga ko‘ra, 2025-yil 1-oktyabrdan akademiyada davlat xizmatidagi rahbarlar, rahbarlikka nomzodlar va boshqaruv kadrlari malakasini oshirish bo‘yicha qisqa muddatli kurslar joriy etiladi. Qisqa muddatli kurslar yakunlari bo‘yicha davlat xizmatchilarining olgan bilim va ko‘nikmalari diagnostikadan o‘tkaziladi.
2026-yil 1-yanvardan boshlab Davlat siyosati va boshqaruvi akademiyasida muddati 6 oygacha bo‘lgan quyidagi qayta tayyorlash ta’lim dasturlari joriy etiladi:
- geosiyosat, global xavfsizlik, barqaror rivojlanish, loyiha boshqaruvi kabi yo‘nalishlarda Prezident Administratsiyasi topshirig‘iga muvofiq tashkil etiladigan maxsus kurslar;
- “Rahbar ayollar” dasturi (tashabbuskor ayollarning rahbarlik ko‘nikmalarini rivojlantirish maqsadida);
- “Kelajak liderlari” dasturi (istiqbolli yoshlarni davlat xizmatiga jalb etish maqsadida);
- “Tizimli tahlil, strategik rejalashtirish va maqsadli ko‘rsatkichlarga erishish” dasturi;
- “Hududlarni ijtimoiy-iqtisodiy rivojlantirish va xorijiy investisiyalarni jalb etish” dasturi;
- “Kadrlar zaxirasini shakllantirish va inson resurslarini rivojlantirish” dasturi;
- “Davlat dasturlari va loyihalarini samarali boshqarish” dasturi.
Qayta tayyorlash ta’lim dasturlariga nomzodlar ro‘yxatini Davlat xizmatini rivojlantirish agentligi shakllantiradi hamda har yili 1-iyulga qadar akademiyaga taqdim etib boradi.
2025/2026-o‘quv yilidan “Hududlarni kompleks rivojlantirish”, “Davlat boshqaruvi”, “Inson resurslarini rivojlantirish” magistratura mutaxassisliklari bo‘yicha kadrlar tayyorlanadi.
2026/2027-o‘quv yilidan:
- “Davlat siyosati” (Public Policy) va “Davlat moliyasini boshqarish” (Public Finance Management) magistratura mutaxassisliklari bo‘yicha kadrlar tayyorlanadi;
- yuqori malakali va zamonaviy bilimlarga ega boshqaruv kadrlari zaxirasini shakllantirib borish maqsadida amaliyotchi boshqaruvchilar uchun maxsus dasturlar (Executive MPA va Executive MBA) joriy etiladi;
- magistratura dasturlari xorijdagi nufuzli oliy ta’lim tashkilotlari bilan hamkorlikda qo‘shma ta’lim dasturlari va modullar bo‘yicha tashkil etiladi.
Davlat boshqaruvi akademiyasini Prezident huzuridagi Davlat siyosati va boshqaruvi akademiyasi etib qayta tashkil etish ko‘zda tutilayotgani 5-may kuni Shavkat Mirziyoyev istiqbolli kadrlarni maqsadli tayyorlash va mutaxassislarning xorijda ta’lim olishini qo‘llab-quvvatlashga oid takliflar taqdimoti bilan tanishganida ma’lum qilingandi. Akademiyada ta’lim dasturlari va ilmiy tadqiqotlar sifatini oshirish bo‘yicha tavsiyalar berish, nufuzli xorijiy ilmiy-ta’lim muassasalari bilan hamkorlik o‘rnatish uchun Xalqaro akademik maslahat kengashi tuziladi.
Prezident huzuridagi Davlat boshqaruvi akademiyasi haqida
Akademiya davlat tomonidan moliyalashtiriluvchi va o‘ziga xos oliy ta’lim muassasa bo‘lib, u Toshkent shahrida joylashgan. 1995-yil may oyida Davlat va jamiyat qurilishi akademiyasi sifatida tashkil topgan mazkur ta’lim muassassasi prezident tomonidan tashkil etilgan yagona bilim yurti bo‘lib, unda ham markaziy, ham mahalliy xukumat idoralari xodimlari uchun ilmiy daraja beruvchi hamda ilmiy daraja bermaydigan turli dastur va kurslar taqdim etiladi. 2012 yilda mazkur bilim yurti Prezident huzuridagi Davlat boshqaruvi akademiyasi sifatida qayta tuzilgan.
Milliy va hududiy xokimiyat boshqaruv tizimidagi xodimlarni onlayn va bevosita samarali tayyorlash va qayta tayyorlash, hamda ma’muriy boshqaruv tizimini rivojlantirish, faoliyatini tashkillashtirish va takomillashtirishni o‘rganish orqali davlat boshqaruvini rivojlantirish ushbu oliy o‘quv yurtining asosiy maqsadidir.
Izoh (0)