6-fevral kuni Shavkat Mirziyoyevning Turkiya Respublikasi prezidenti Rajab Toyyib Erdo‘g‘on bilan telefon orqali muloqoti bo‘lib o‘tdi. Bu haqda Prezident matbuot xizmati xabar qildi.
Qayd etilishicha, O‘zbekiston rahbari shu kuni Turkiyaning janubi-sharqiy viloyatlarida ro‘y bergan kuchli zilzila oqibatida ko‘plab insonlar qurbon bo‘lgani va katta talafotlar ko‘rilgani munosabati chuqur hamdardlik izhor etgan. Turkiya xalqiga, vafot etganlar va jabrlanganlarning oilalari va yaqinlariga dalda so‘zlari bildirilgan.
Tabiiy ofat oqibatlarini bartaraf etish maqsadida amaliy hamkorlik masalalari muhokama qilingan. 7-fevral kuni O‘zbekistondan Turkiyaga gumanitar yordam va qutqaruvchilar guruhi jo‘natilishi rejalashtirilgan.
Ikki tomonlama kun tartibi va mintaqaviy hamkorlikning dolzarb jihatlari yuzasidan ham fikr almashilgan.
Avvalroq Shavkat Mirziyoyev Turkiya janubi-sharqiy qismidagi viloyatlarda yuz bergan kuchli zilzila oqibatlari munosabati bilan Rajab Toyyib Erdo‘g‘onga hamdardlik yoʻllagandi.
O‘zbekiston TIV matbuot xizmati bergan ma’lumotga ko‘ra, 6-fevral Toshkent vaqti bilan soat 11:00 holatiga koʻra, O‘zbekistonning Turkiyadagi diplomatik vakolatxonalariga zilzila oqibatida halok bo‘lgan va jarohatlangan O‘zbekiston fuqarolari bo‘yicha ma’lumot kelib tushmagan.
Izoh (0)