Yuzlab nemis madaniyat arboblari va ommaviy axborot vositalari xodimlari Germaniya kansleri Fridrix Mertsni Isroilga qurol yetkazib berishni to‘xtatishga chaqirdi. Bu haqda DW nashri xabar bermoqda.
6-avgust chorshanba kun holatiga G‘azo sektorida HAMAS terrorchilik guruhiga qarshi harbiy operatsiyasi munosabati bilan Isroilga bosim o‘tkazish talabi bilan 367 nafar aktyor, rejissyor, musiqachi, prodyuser, ssenariy muallifi, operator va boshqa madaniyat hamda OAV xodimlari ochiq xatga imzo qo‘yishgan. Dastlab, 200 dan ortiq taniqli nemislar tomonidan imzolangan murojaatnoma 31 iyul kuni e’lon qilingan edi.
“Biz, shuningdek, HAMASning dahshatli jinoyatlarini keskin qoralaymiz. Ammo hech qanday jinoyat millionlab begunoh odamlarni eng shafqatsiz tarzda jamoaviy jazolashni oqlamaydi”, deyiladi “Avaaz” inson huquqlari tashkiloti tashabbusi bilan yozilgan maktubda.
Ochiq xatda G‘azo sektori aholisi, jumladan, bolalar halokatli ahvolda ekani ta’kidlangan.
“G‘azo ochlikdan azob chekayotgan va yuz minglab odamlarni qabul qilish uchun lagerlar rejalashtirilayotgan bir paytda Isroil hukumatini to‘liq qo‘llab-quvvatlashni davom ettirish Germaniya davlat manfaatlariga mutlaqo zid”, deya ishonch bildirgan murojaat mualliflari.
Ularning fikricha, Merts “Isroilni yo‘nalishni o‘zgartirishga ishontira oladigan kam sonli shaxslardan biri”.
“Germaniya hukumati Isroilga qurol eksportini to‘xtatishdan tashqari, Yevropa Ittifoqi va Isroil o‘rtasidagi assotsiatsiya bitimini to‘xtatishni qo‘llab-quvvatlashi va zudlik bilan o‘t ochishni to‘xtatish hamda gumanitar yordamga to‘siqsiz yo‘l ochishni qat’iy talab qilishi kerak”, deyiladi ochiq xatda.
Murojaatni imzolaganlar orasida nemis kinosi yulduzi, aktrisa Sandra Xyuller, mashhur nemis rejissyori Fotih Akin va “Oltin globus”, Yevropa kinoakademiyasi mukofoti hamda “Sezar” mukofoti sovrindori, isroillik kinorejissyor Ari Folman bor.
Izoh (0)