Jahon banki hisobotiga ko‘ra, 6-fevral kuni Turkiya va Suriyada sodir bo‘lgan zilzila Suriyaga 5,1 milliard dollarga yaqin zarar yetkazgan.
Shikastlangan infratuzilmaning narxi mamlakat yalpi ichki mahsulotining taxminan 10 foizini tashkil qiladi. Suriyaning 10 millionga yaqin aholi istiqomat qiladigan to‘rt viloyatiga jiddiy zarar yetgan.
Xabarda aytilishicha, davom etayotgan aftershoklar tufayli zarar miqdori ortishi mumkin. Jahon banki e’lon qilgan summaning 18 foizi infratuzilma (transport, energetika va suv ta’minoti), 48,5 foizi turar joy binolariga va 33,5 foizi noturarjoy binolariga (tibbiyot muassasalari, maktablar, xususiy uylar) yetkazilgan zararga to‘g‘ri keladi.
“Yo‘qotishlar Suriya xalqi o‘tgan yillar davomida boshdan kechirgan ko‘p yillik vayronagarchilik, azob-uqubatlar va mahrumlik tufayli yanada kuchaydi”, — dedi Jahon bankining Yaqin Sharq bo‘yicha direktori Jan-Kristof Karre. Uning qo‘shimcha qilishicha, tabiiy ofat ish faolligini pasaytiradi va Suriyaning iqtisodiy o‘sish istiqbollarini yanada og‘irlashtiradi.
6-fevral kuni Turkiya va Suriyada 7,7 magnitudali zilzila sodir bo‘ldi, undan keyin kuchsizroq silkinishlar ro‘y berdi.
12-fevral kuni Jahon sog‘liqni saqlash tashkiloti Suriyadagi zilzila oqibatida 8,5 mingga yaqin odam halok bo‘lgani va 10 mingga yaqin kishi jarohatlangani haqida xabar bergan bo‘lsa, 14-fevral kuni Suriya Sog‘liqni saqlash vazirligi 1 414 qurbon haqida ma’lum qildi.
1-mart holatiga ko‘ra Turkiyada zilzila qurbonlari soni 45 089 kishiga yetgan. Prezident Rajab Toyyib Erdo‘g‘an bu tabiiy ofatni mamlakat tarixidagi eng halokatli deb atagan.
Izoh (0)