Isroil aholisi oltinchi haftadirki, yangi bosh vazir Benyamin Netanyaxu boshchiligidagi hukumatga va mamlakatda sud tizimini zaiflashtiradigan Oliy sud islohotiga qarshi norozilik namoyishi o‘tkazmoqda. Bu haqda Haaretz portali xabar berdi.
11-fevral kuni kechqurun Quddus, Tel-Aviv, Hayfa va boshqa shaharlarda 80 mingdan ortiq odam ko‘chalarga chiqdi; Netanyaxuga qarshi namoyishlar boshlanganidan buyon ilk bor Firot daryosining g‘arbiy sohilida ham mitinglar bo‘lib o‘tdi. Portalning qayd etishicha, namoyishchilar havoning sovuqligi va havo hujumidan ogohlantiruvchi sirenalarga qaramay, tarqalmagan.
“Uylarimizni vayron qilish tahdidini solayotgan zilzila tabiiy ofat emas, bu inson qo‘li bilan yaratilgan”, — dedi Isroil sobiq Adliya vaziri Sipni Livni Tel-Avivda 50 ming kishi yig‘ilgan namoyishda. Uning ta’kidlashicha, bu “zilzila” boshida Netanyaxu va uning sheriklari turibdi, ular “qasos va nafrat” bilan harakat qilmoqda.
Mitingda sobiq mudofaa vaziri Moshe Bogi Yaalon Isroilning amaldagi hukumatini “jinoyatchi diktatura”, shuningdek, “fashistik, irqchi, gomofobik odamlar guruhi” deb atadi.
7000 ga yaqin namoyishchilar prezident Isxak Gersogning uyi oldida ham to‘planishdi, prezident Netanyaxuning harakatlariga sust darajada javob bergani uchun tanqid qilinmoqda. So‘ng namoyishchilar prezident qarorgohidan bosh vazirning shaxsiy uyi tomon yo‘l oldi, u yerda politsiya yo‘lni to‘sib qo‘ydi.
Xalq sud islohotiga qarshi norozilik bildirmoqda
Dekabr oyi oxirida Isroilda yangi hukumat qasamyod qilgan edi. Bir yarim yil muxolifatda bo‘lganidan so‘ng bosh vazirlik lavozimiga qaytgan Netanyaxu Vazirlar Mahkamasining 33 a’zosini tanishtirdi, ular orasida o‘ngchi natsionalist diniy koalitsiyadan ham vakillar bor.
Adliya vazirligi rahbari Yariv Levin tomonidan taklif qilingan sud-huquq islohoti yangi Vazirlar Mahkamasining eng rezonansli tashabbuslaridan biri bo‘ldi. Uning fikricha, Oliy sudning vakolatlari qonunlar va hukumat qarorlari bilan cheklanadi, Vazirlar Mahkamasi sudyalarni tanlash ustidan nazoratni ham o‘z qo‘liga oladi. Shunday qilib, biror qonun hatto Oliy sud tomonidan mamlakat konstitutsiyasiga zid deb topilsa ham, parlament uni qabul qilish imkoniyatiga ega bo‘ladi.
Muxolifatchilar bu islohot Isroilning demokratik qadriyatlariga tahdid soladi, deb hisoblamoqda. So‘rovnomalarga ko‘ra, aholining 60 foizdan ortig‘i hukumat buni to‘xtatish yoki keyinga qoldirishni xohlamoqda.
Netanyaxu norozilik namoyishlarini muxolifatning uning saylovlardagi g‘alabasini tan olishdan bosh tortishi deb atadi. Yanvar oyi oxirida u rezonansga qaramay, islohot amalga oshirilishini e’lon qildi.
Izoh (0)