6-fevral kuni dunyo ahlining diqqat - eʼtibori Turkiyada sodir boʻlgan kuchli yer silkinishiga qaratildi. Mamlakatning qator shaharlarini vayron qilgan zilzilada, oxirgi maʼlumotlarga koʻra, — 3 419 kishi halok boʻldi, salkam 20 534 kishi jarohatlandi.
7,4 magnitudali yer silkinishi taʼsirida bir necha shaharlarda 6 mingtaga yaqin binolar butunlay vayron boʻldi. Vayronalar ostidan jami 8 000 nafardan ortiq odam tiriklayin olib chiqildi. 338 ming kishi yotoqxonalar, universitetlar va boshpanalarga joylashtirildi.
Prezident Rajab Toyyib Erdoʻgʻon Turkiyada tabiiy ofat qurbonlari munosabati bilan yetti kunlik milliy motam eʼlon qildi. Uning aytishicha, bu zilzila Turkiya tarixidagi 1939-yildagi zilziladan keyingi eng katta ofatdir.
Hukumat aholini takrorlanadigan yer silkinishlaridan ogohlantirib, uylariga qaytmaslikka chaqirdi.
Maʼlumotlarga koʻra, Turkiyada sodir boʻlgan birinchi zilziladan keyin yana 145 ta yer silkinishlari qayd etilgan. Mamlakat hukumati binolar ostida qolib ketgan, jarohatlanganlarni qutqarish boʻyicha tezkor brigadalar tashkil etib, qutqaruv xizmatlarini jalb qilgan.
Koʻplab mamlakatlardan Turkiya xalqiga chuqur hamdardlik bildirilib, insonparvarlik yordamlari yuborilmoqda. Ayni paytgacha zilzila hududlariga xorijdan 3 294 nafar qutqaruvchi yetib kelgan. 70 ta davlat yordamga tayyorligini maʼlum qilgan, Shundan 14 tasining vakillari allaqachon ofat zonasida. Turkiyadan va xorijdan 1 600 nafardan ortiq qutqaruvchilar guruhi Hatay viloyatiga boradi.
Oʻzbekiston prezidenti Shavkat Mirziyoyev Rajab Toyyib Erdoʻgʻon bilan telefon orqali muloqot qilib, Turkiyaning janubi-sharqiy viloyatlarida roʻy bergan kuchli zilzila oqibatida koʻplab insonlar qurbon boʻlgani va katta talafotlar koʻrilgani munosabati chuqur hamdardlik izhor etdi. Turkiya xalqiga, vafot etganlar va jabrlanganlarning oilalari va yaqinlariga sabr tiladi.
Favqulodda vaziyatlar vazirligi Turkiyaga Oʻzbekistondan 100 kishidan iborat qidiruv-qutqaruv otryadi joʻnatilayotganini maʼlum qilgan. “Oʻzbekiston prezidentining topshirigʻiga asosan, 7-fevral kuni zilziladan talofat koʻrgan Turkiya respublikasiga insonparvarlik yordami va FVV qidiruv-qutqaruv boʻlinmalari joʻnatiladi. Turkiyada sodir boʻlgan vayronkor zilzila oqibatlarini bartaraf etishga Oʻzbekiston FVVning maxsus texnika va kinologiya xizmati jalb etiladi”, — deyiladi vazirlik axborotida.
Turkiyadagi zilzila ortidan yana 6 ta davlatda yer qimirlashlari yuz berdi. Xususan, Suriya, keyin Livan, Iordaniya, Isroil, Gruziya, Armaniston va Afgʻonistonda zilzilalar qayd etilgan. Suriyada sodir boʻlgan kuchli yer silkinishi oqibatida 764 kishi halok boʻlgan, 1 ming 448 kishi jarohatlangan.
Ijtimoiy tarmoqlarda jamoatchilik shu kabi kuchli zilzila Oʻzbekistonga ham yetib kelishi mumkinligidan xavotir bildirdi. FVV bu haqdagi fikrlar yuzasidan eʼlon qilgan rasmiy munosabatida, Oʻzbekistonda yaqin orada kuchli zilzilalar sodir boʻlmasligini maʼlum qildi.
Soʻnggi xabarlarga koʻra, bugun, 7-fevral kuni, Toshkent vaqti bilan 08:13 da ham Turkiyaning markaziy qismida 5,3 magnitudali yangi zilzila sodir boʻldi. Zilzila epitsentri Anqaradan 43 km, Besni shahridan 13 km uzoqlikda joylashgan. Hozircha uning tafsilotlari toʻliq ochiqlanmagan.
Izoh (0)