Prezident Shavkat Mirziyoyevning topshirig‘i bilan, Afg‘oniston aholisiga insonparvarlik yordami va “Salomatlik” poyezdi jo‘natildi. Bu haqda Surxondaryo viloyati hokimligi xabar berdi.
Maʼlum qilinishicha, Afg‘oniston aholisini bepul tibbiy ko‘rikdan o‘tkazish, zarur oziq-ovqat hamda dori-darmon vositalari shaklidagi insonparvarlik yuki Afg‘oniston xalqiga yetkazib berildi.
Jami 9 vagondan iborat “Salomatlik” tibbiy-sanitar yordami 25—30-dekabr kunlari Afg‘onistonning Balx viloyatida bir guruh aholi malakali shifokorlar tomonidan bepul tibbiy ko‘rikdan o‘tkaziladi.
Mazkur insonparvarlik yordami O‘zbekiston va Afg‘oniston hukumatlarining uchrashuvida afg‘on xalqini O‘zbekiston shifokorlari tomonidan bepul tibbiy ko‘rikdan o‘tkazishda ko‘mak ko‘rsatish so‘roviga asosan amalga oshirilmoqda.
Aprel oyida Surxondaryo viloyati hokimi Ulug‘bek Qosimov boshchiligidagi delegatsiya O‘zbekiston xalqi nomidan birodar afg‘on xalqiga navbatdagi insonparvarlik yordamini yetkazgan edi.
Shuningdek, 2023-yil aprelda ham O‘zbekistondan afg‘on xalqiga 185 tonnadan ortiq zaruriy oziq-ovqat mahsulotlari ortilgan navbatdagi insonparvarlik yordamini jo‘natgandi.
2022-yilda bo‘lsa zilzila oqibatida jabr ko‘rganlarga yordam ko‘rsatish maqsadida O‘zbekiston prezidenti Shavkat Mirziyoyev topshirig‘iga binoan Afg‘onistonga navbatdagi insonparvarlik yordami yuborilgan edi.
Izoh (0)