O‘zbekistonda nogironligi bo‘lgan shaxslarni ishga qabul qilgan tadbirkorlarga 2025-yil 1-iyundan 50 million so‘mgacha subsidiya ajratiladi. Bu haqda prezident farmonida belgilandi.
“Nogironligi bo‘lgan shaxslarning bandligini ta’minlash tizimini takomillashtirishga oid qo‘shimcha chora tadbirlar to‘g‘risida”gi prezident farmoni bilan asosiy maqsadlar etib quyidagilar belgilandi:
- nogironligi bo‘lgan shaxslarning samarali faoliyat ko‘rsatishi uchun maxsus xizmatlar tizimini joriy etish;
- nogironligi bo‘lgan yoshlarni zamonaviy kasblarga o‘qitish, ularning mehnat bozoriga kirishi uchun qo‘shimcha imkoniyatlar yaratish;
- 2025-yil yakuniga qadar 80 ming nafar nogironligi bo‘lgan shaxsning barqaror bandligi va munosib daromad topishini ta’minlash.
Hujjatga ko‘ra, 2025-yil 1-iyundan boshlab I va II guruh nogironligi bo‘lgan shaxslarni ishga qabul qilgan tadbirkorlik subyektlariga 50 million so‘mgacha subsidiya ajratiladi. Subsidiya surdotarjimon, psixolog va hamrohlik xizmatini tashkil qilish xarajatlarini qoplash uchun ajratiladi.
Shu sanadan boshlab jismoniy shaxslarga hamrohlik xizmatini o‘zini o‘zi band qilgan shaxs sifatida ko‘rsatishga ruxsat beriladi. Shuningdek, “Yagona milliy ijtimoiy himoya” axborot tizimida Mehnatga layoqatli nogironligi bo‘lgan shaxslarning elektron reyestri yuritiladi.
Ish beruvchiga nogironligi bo‘lgan har bir shaxsni ishga qabul qilganligi uchun 6 oy davomida ishlangan har bir oy uchun BHMning 1,5 baravari miqdorida subsidiya ham beriladi. Bu hukumatning “Nogironligi bo‘lgan shaxslarning bandligiga ko‘maklashishni rag‘batlantirish chora-tadbirlari to‘g‘risida”gi qarorida belgilangan. O‘zbekistondagi barcha aeroport, vokzal, avtoshohbekatlarda jismoniy imkoniyati cheklanganlar uchun sharoitlar yaratiladi.
“Nogironligi bo‘lgan bolalarga ijtimoiy xizmat va yordam ko‘rsatish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi prezident qarori bilan nogironligi bo‘lgan bolalar uchun kunduzgi parvarish xizmati yo‘lga qo‘yildi.
Izoh (0)