Navro‘z bayrami hamda Ramazon hayiti munosabati bilan O‘zbekistondan afg‘on xalqiga qariyb 200 tonnadan ortiq oziq-ovqat mahsulotlari ortilgan navbatdagi insonparvarlik yordami yetkazildi. Bu haqda Surxondaryo viloyati hokimligi axborot xizmati xabar berdi.
Ma’lum qilinishicha, 21-mart kuni afg‘on xalqiga navbatdagi insonparvarlik yordami yuki ortilgan maxsus yuk mashinalari Termiz orqali Afg‘onistonning Balx viloyatiga yuborilgan.
Insonparvarlik yordami tarkibidan un, bug‘doy, makaron mahsulotlari, o‘simlik yog‘i, shakar, tez tayyorlanadigan taomlar, qizil loviya va mosh o‘rin olgan.
Qo‘shni mamlakatga yetkazilgan mahsulotlar Hayraton shahridagi “Astras” kompaniyasi hududida ikki tomon rasmiylari ishtirokida topshirilgan.
Ta’kidlanishicha, Mozori Sharif shahrida rasmiylar ishtirokida ikki tomonlama uchrashuv o‘tkazilib, kelgusidagi hamkorlik aloqalarini rivojlantirish masalalari muhokama qilingan.
Suhbat davomida O‘zbekiston tomonidan Afg‘onistonda barpo etilayotgan Imom Buxoriy maqbarasi qurilishi haqida ham alohida fikr almashingan.
Afg‘oniston rasmiylari O‘zbekiston prezidenti va xalqiga ko‘rsatayotgan yordam uchun minnatdorchilik bildirib, yaqinlashib kelayotgan Ramazon hayiti munosabati bilan samimiy tabriklarini yo‘llashgan.
O‘tgan yilning dekabr oyida prezident Shavkat Mirziyoyevning topshirig‘i bilan, Afg‘oniston aholisiga insonparvarlik yordami va “Salomatlik” poyezdi jo‘natilgandi.
Aprel oyida Surxondaryo viloyati hokimi Ulug‘bek Qosimov boshchiligidagi delegatsiya O‘zbekiston xalqi nomidan birodar afg‘on xalqiga navbatdagi insonparvarlik yordamini yetkazgan edi.
Shuningdek, 2023-yil aprelda ham O‘zbekistondan afg‘on xalqiga 185 tonnadan ortiq zaruriy oziq-ovqat mahsulotlari ortilgan navbatdagi insonparvarlik yordamini jo‘natgandi.
2022 yilda bo‘lsa zilzila oqibatida jabr ko‘rganlarga yordam ko‘rsatish maqsadida O‘zbekiston prezidenti Shavkat Mirziyoyev topshirig‘iga binoan Afg‘onistonga navbatdagi insonparvarlik yordami yuborilgan edi.
Izoh (0)