Dominikan Respublikasi poytaxti Santo Domingodagi mashhur tungi klubda 8-aprel kuni tom qulab tushishi oqibatida 79 kishi halok bo‘ldi. Klubda siyosatchilar, sportchilar va boshqa mashhurlar ishtirokida konsert bo‘layotgandi. Bu haqda AP News xabar berdi.
Qutqaruvchilar tom qulaganidan qariyb 12 soat o‘tgach ham vayronalar ostidan odamlarni tirik holda chiqargan. Hodisa oqibatida 160 nafardan ortiq odam jarohatlangan. Jet Set nomli bir qavatli klub xarobalari ostida tirik qolganlarni qidirish ishlari davom etmoqda.
Biz ularning ko‘pchiligi hali tirik bo‘lishi mumkin, deb taxmin qilyapmiz. Shu sababli bu yerda hokimiyat vakillari oxirgi odam topilmaguncha to‘xtamaydi, dedi Favqulodda vaziyatlar bo‘yicha operatsiyalar markazi rahbari Xuan Manuel Mendes.
Qurbonlar orasida shimoli-g‘arbiy Montekristi viloyati gubernatori, yetti karra beysbol yulduzi Nelson Kruz va uning opasi ham bor. Jarohat olganlar orasida esa sobiq Amerika beysbol ligasi o‘yinchisi Oktavio Dotel, qonunchi Bray Vargas va mashhur merengue xonandasi Rubby Peres bor. Peres sahnada ijro etayotganida klub tomi tomoshabinlar ustiga qulagan.
Konsert yarim tunga yaqin boshlangan va taxminan bir soatdan keyin tom qulab tushgan. Oqibatda guruhning saksofonchisi halok bo‘lgani aytildi.
Hamma narsa juda tez sodir bo‘ldi. Men o‘zimni burchakka otishga ulgurdim, dedi Peresning menejeri Enrike Paulino. Avvaliga u mazkur hodisani zilzila deb o‘ylaganini qo‘shimcha qildi.
Tomning qulashiga nima sabab bo‘lgani hozircha noma’lum. Prezident Luis Abinader ijtimoiy tarmoqdagi sahifasida barcha qutqaruv xizmatlari “tinmay ishlayotgani”ni ma’lum qildi. Klub yaqinida vaqtinchalik morg tashkil qilingan. Shuningdek, ikki markazda qon topshirish uchun 120 dan ortiq ko‘ngillilar navbatga turgan.
Izoh (0)