Turkiyadagi zilzila qurbonlari soni 4 544 nafarga, jarohatlanganlar soni esa 26 725 nafarga yetdi. Bu haqda CNN xabar berdi.
Turkiya Favqulodda vaziyatlar boshqarmasining zilzilalar va xavflarni yumshatish departamenti bosh direktori Orxan Tatar tegishli ma’lumotni e’lon qildi.
“So‘nggi ma’lumotlarga ko‘ra, 4 544 kishi halok bo‘lgan, 26 725 kishi jarohatlangan”, — dedi rasmiy jurnalistlarga.
Turkiya janubi-sharqida 6-fevral kuni ertalab 7,8 magnitudali zilzila yuz berdi va bu 1939-yildan beri eng kuchli zilzila bo‘ldi. Shu kuni tushdan keyin yana 7,6 magnitudali zilzila qayd etildi.
Prezident Rajab Toyyib Erdo‘g‘on Turkiyada tabiiy ofat qurbonlari uchun 7 kunlik milliy motam, zilziladan zarar ko‘rgan 10 ta viloyatda esa 3 oylik favqulodda holat e’lon qildi. Hozirgacha vayronalar ostidan sakkiz mingdan ortiq odam qutqarib olingan.
“Biz nafaqat Turkiya tarixidagi, balki butun mintaqa va dunyo tarixidagi eng katta falokatlardan biriga duch keldik. Barcha davlat tuzilmalarining sa’y-harakatlari, shaxsiy tarkib va texnika tabiiy ofat zonasida ishlashga safarbar qilingan. Birinchi bosqichda tabiiy ofat zonasi aholisiga shoshilinch yordam ko‘rsatish uchun 100 milliard lira ajratildi”, — dedi Turkiya prezidenti.
Zilzila zonasiga 54 ming chodir, 102 ming karavot, eng zarur buyumlar yuborilgan. Besh ming tibbiyot xodimi o‘nta viloyat aholisiga yordam bermoqda.
Erdo‘g‘onning so‘zlariga ko‘ra, tabiiy ofat hududida hozirda 53 317 nafar qutqaruvchi ishlamoqda. Ularning soni Turkiya va boshqa mamlakatlardan kelgan jamoalar tufayli kundan kunga ortib bormoqda.
Mavzuga doir:
Izoh (0)