Prezident Shavkat Mirziyoyev Myanmada ro‘y bergan kuchli zilzila oqibatida ko‘plab insonlar halok bo‘lgani va jabrlangani, jiddiy talafotlar ko‘rilgani munosabati bilan Myanma Ittifoqi Respublikasi Davlat boshqaruvi kengashi raisi General Min Aung Hlaingga hamdardlik maktubi yo‘lladi. Bu haqda O‘zbekistonning Bangkokdagi Bosh konsulxonasi xabar berdi.
Davlat rahbari ushbu og‘ir va musibatli damlarda qurbon bo‘lganlarning oila aʼzolari va barcha yaqinlariga, Myanma xalqiga chuqur taʼziya va hamdardlik izhor etdi.
Zilzila oqibatlari
28-mart kuni Myanmada yuz bergan zilzila qurbonlari mingdan ortdi. 7,7 magnitudali zilzila usiz ham fuqarolar urushi domida qolgan mamlakatda ko‘priklar, aeroportlar va boshqa infratuzilmaga jiddiy zarar yetkazdi.
Seysmologlarga ko‘ra, bu 1946-yildan beri mamlakatda sodir bo‘lgan eng kuchli zilzila hisoblanadi. Uning episentri Myanmaning ikkinchi yirik shahri Mandalay g‘arbida bo‘lgan. Silkinish to‘lqinlari poytaxt Neypido va boshqa yirik shaharlarda ham sezilgan.
Myanma va Tailandda yuz bergan kuchli zilzila oqibatida jabrlanganlar orasida O‘zbekiston fuqarolari aniqlanmagani haqida xabar berilgandi.
Izoh (0)