So‘nggi yillarda harbiy va tibbiyot sohalarida sun’iy intellektni rivojlantirishga salmoqli hissa qo‘shgan bir necha xitoylik olimlar erta yoshda, noaniq sabablarga ko‘ra vafot etgan. Bu haqda South China Morning Post gazetasi e’lon qilgan maqolasida xabar berdi.
Nashr nisbatan yosh paytida vafot etgan sun’iy intellekt sohasidagi yetakchi olimlar ro‘yxatini tuzdi. Ularning aksariyati o‘z karyeralarining cho‘qqisida bo‘lib, kompyuter, harbiy va tibbiy sohalardagi sun’iy intellekt kabi muhim yo‘nalishlarda kashfiyotlar qilgan.
Ma’lumotlarga ko‘ra, 2022-yil iyun oyida tasvirlarni aniqlash va chuqur o‘rganish uchun dasturiy ta’minot ishlab chiqaruvchi Xitoyning Megvii Technology kompaniyasining sobiq bosh ilmiy xodimi, axborot texnologiyalari bo‘yicha mutaxassis Sun Jian 45 yoshida vafot etgan.
Shuningdek, 2023-yilda ikkita fojiali hodisa yuz bergan. Ulardan birinchisi mudofaa sohasidagi sun’iy intellekt mutaxassisi Feng Yanghe bilan bog‘liq. Rasmiy ta’ziyanomada ko‘rsatilishicha, u 38 yoshida topshiriqni bajarish paytida halok bo‘lgan. Uning tadqiqotlari harbiy o‘yinlar va sun’iy intellekt texnologiyalari yordamida rejalashtirish bilan bog‘liq edi.
Keyinroq yana bir tadqiqotchi — yuzni tanib olish modellarini ishlab chiqishga ixtisoslashgan SenseTime texnogiganti asoschisi Tan Syaou vafot etgani ma’lum bo‘ldi. U 55 yoshida vafot etgan va nekrologda uning o‘limiga kasallik sabab bo‘lgani aytilgan, biroq kasallikning turi aniqlanmagan.
Gazeta xabar bergan so‘nggi hodisa 2024-yilda sodir bo‘lgan. Katta ma’lumotlar va sun’iy intellekt texnologiyalari asosida sog‘liqni saqlash sohasida yechimlar ishlab chiqaruvchi Yidu Tech kompaniyasining hammuassisi va innovatsiyalar bo‘yicha bosh direktori He Zhi 40 yoshida tog‘ kasalligi xuruji va uning hayotini saqlab qolishga bo‘lgan muvaffaqiyatsiz urinish natijasida vafot etgan.
“Sun’iy intellekt sanoati juda tez rivojlanmoqda va raqobat tobora keskinlashib bormoqda. Sun’iy intellekt tarqalishi bilan jamiyatga sezilarli ta’sir ko‘rsatishi mumkin va jamiyatdagi ulkan o‘zgarishlarning noma’lum salohiyati ham odamlarga jiddiy ma’naviy bosim o‘tkazishi mumkin”, dedi xitoylik kompyuter olimi Liyu Shaoshan.
Uning tushuntirishicha, bir tadqiqotchi yangi g‘oyani ishlab chiqib, tajriba o‘tkazayotgan paytda, boshqa olim xuddi shunday mavzu bo‘yicha natijalarni e’lon qilishga ulgurishi mumkin.
Izoh (0)