NASA Mars Chopper deb nomlangan yangi vertolyotni ishlab chiqmoqda. U yengil avtomobil hajmida bo‘lib, og‘irligi 40 kilogrammni tashkil etadi.
Qurilma 5 kilogacha ilmiy asbob-uskunalarni olib yurishi va 3 kilometrgacha masofani bosib o‘tishi mumkin. Mars Chopper’ning vazifasi sayyoraning yetib borish qiyin bo‘lgan — marsoxodlar uchun mavjud bo‘lmagan hududlarini o‘rganishdan iborat bo‘ladi.
Mars Chopper uchun taklif etilgan missiyalardan biri — Nighthawk loyihasi bo‘lib, u Noctis Labyrinthus hududini o‘rganishni nazarda tutadi. Bu hudud murakkab kanyonlar va lava maydonlaridan iborat. Olimlar fikricha, bu yerda muz holatidagi suv va ehtimoliy biologik izlar bo‘lishi mumkin. Bu esa uni hayot belgilarini izlash uchun istiqbolli qiladi.
Nighthawk missiyasini bajarish uchun Mars Chopper’ni umumiy og‘irligi 3 kilogramm bo‘lgan uchta ilmiy asbob, jumladan, har tomonga yo‘naltirilgan kamera, spektrometr va tuproqning yuqori qatlamlaridagi suv miqdorini baholash uchun neytron detektori bilan jihozlash rejalashtirilgan. Ushbu uskunalar ehtimoliy suv zaxiralarini aniqlash hamda hududning geologik evolyutsiyasini o‘rganishda yordam beradi.
Mart oyida NASA Marsda qadimgi hayotning ehtimoliy izlarini topgan edi. Jumladan, sayyora yuzasidagi qoyalardan “ko‘knori urug‘lari” deb nomlangan qora dog‘lar va “qoplon dog‘lari” qayd etilgan.
Yerdagi bunday tuzilmalar odatda qadimgi mikrob faoliyati bilan bog‘lanadi. Biroq ular noorganik jarayonlar, masalan, vulqon otilishi natijasida ham hosil bo‘lishi mumkin. NASA mutaxassislari fikricha, aniqlangan cho‘kindilar past haroratli reaksiyalar sharoitida shakllangan bo‘lishi mumkin, bu esa ularning biologik kelib chiqishi haqidagi farazni qo‘llab-quvvatlashi mumkin.
Izoh (0)