AQSHda biotexnolog olimlar 13 ming yil avval yo‘qolib ketgan bo‘ri turini qadimgi DNK asosida qayta tikladi. Ular tur belgilariga ega ikkita erkak va bitta urg‘ochi bo‘ri oldi. Bu haqda The New York Times xabar berdi.
2021-yilda Colossal Biosciences biotexnologiya kompaniyasi olimlari mashhur “Taxtlar o‘yini” seriali orqali tanilgan va butunlay yo‘q bo‘lib ketgan “dahshatli bo‘rilar” (dire wolves) qoldiqlaridan DNK ajratib olishga muvaffaq bo‘lgan.
Olimlar ushbu tarixiy turning asosiy xususiyatlarini qaytarish uchun kulrang bo‘rilarning 20 ta genini tahrirlagan. So‘ng, tahrirlangan hujayralar asosida embrionlar yaratilgan va ular surrogat ona itlarga joylashtirilgan.
Natijada uchta sog‘lom bo‘ri dunyoga kelgan: 6 oylik ikkita erkak (Romul va Rem) hamda 2 oylik urg‘ochi (Khalisi). Ular yo‘qolib ketgan bo‘rilar turining ba’zi xususiyatlarini o‘zida saqlab qolgan.
Colossal kompaniyasining bosh ilmiy xodimi Bet Shapironing aytishicha, bu — yo‘q bo‘lib ketgan hayvon turini qayta tiklash yo‘lida erishilgan birinchi muvaffaqiyatli tajriba hisoblanadi.
Biz bir paytlar tirik bo‘lgan mavjudotlarning funksional nusxalarini yaratmoqdamiz, dedi u.
Olimlarning ta’kidlashicha, bu bo‘rilar tabiiy muhitga chiqarilmaydi va tutqunlikda saqlanadi. Shu bilan birga, Colossal kompaniyasi texnologiyasi ayni paytda yo‘qolib ketish xavfi ostida turgan qizil bo‘rilarni saqlab qolishda muhim rol o‘ynashi mumkin.
Izoh (0)