Kolumbiyadagi Xose Mariya Kordova nomidagi aeroportda ichki kiyimiga yashirib qo‘yilgan oltita maymun bolasini olib o‘tmoqchi bo‘lgan erkak va ayol ushlandi. Bu haqda Daily Star xabar bermoqda.
Ta’kidlanishicha, voqea 3-may kuni sodir bo‘lgan, xavfsizlik xizmati xodimlari tekshiruv paytida hayvonlarni aniqlagan.
Musodara qilingan primatlar orasida yo‘qolib ketish xavfi ostida bo‘lgan ikkita oq yelkali kaputsin va to‘rtta paxta tamarini bo‘lgan. Hayvonlar darhol tibbiy ko‘rikdan o‘tkazish va qayta tiklash uchun Korner yovvoyi hayvonlarni parvarish qilish va baholash markaziga yetkazilgan.
Ma’murlarning aytishicha, maymunlar tinchlantiruvchi dorilar ta’sirida bo‘lgan. Ularda suvsizlanish, to‘yib ovqatlanmaslik va shafqatsiz muomala alomatlari aniqlangan. Primatlar mato qoplarga o‘ralib, oyoqlari orasiga yashirilgan, bu esa ularning ahvolini yanada yomonlashtirgan.
Millati hali ma’lum qilinmagan juftlik Dominikan Respublikasiga yo‘l olgan. Ularga hayvonlarga nisbatan shafqatsiz munosabatda bo‘lish, yovvoyi turlar bilan noqonuniy savdo qilish va tabiiy resurslardan foydalanish bo‘yicha ayblov e’lon qilingan.
“Fauna erkin yashashi kerak. Biz bunday jinoyatlarning ko‘payishiga yo‘l qo‘ymaymiz”, dedi Cornare tabiatni muhofaza qilish tashkiloti direktori Xaver Valensiya Gonsales.
Izoh (0)