Amerikalik milliarder Ilon Mask ChatGPT ishlab chiqaruvchisi OpenAI kompaniyasi ustidan sudga murojaat qildi. Bu haqda Courthouse News Service xabar berdi.
Maskning so‘zlariga ko‘ra, kompaniya insoniyat manfaati uchun ishlab chiqilishi kerakligi haqidagi shartni buzgan. Jumladan, OpenAI o‘z texnologiyasining dastabki kodini (isxodniy kod) ochiq qoldirishi kerak edi, biroq Microsoft bilan hamkorlikdan so‘ng kompaniya uni yashirgan va korporatsiyaning “de-fakto sho‘ba korxonasi”ga aylangan.
OpenAI dunyodagi eng yirik texnologik kompaniya — Microsoft’ning amalda de-fakto sho‘ba korxonasiga aylantirildi. Uning rahbarligi ostida kompaniya insoniyat manfaati uchun emas, balki Microsoft foydasini maksimal darajada oshirish uchun sun’iy intellektni takomillashtirmoqda, — deydi Mask sudda.
Miliarder da’vosida OpenAI prezidenti Greg Brokman va bosh direktori Sem Altman ayblanuvchi sifatida ko‘rsatilgan. Mask Microsoft kompaniyasining sun’iy intellekt texnologiyasidan foyda olishni to‘xtatishni talab qilib, dastlabki kodni ochiq qoldirishni so‘ramoqda.
Maskning so‘zlariga ko‘ra, sunʼiy intellektning insonning kognitiv darajasida avtonom ishlashga mo‘ljallangan turi OpenAI’ning asosiy maqsadi bo‘lgan va GPT-4 da namoyish etilgan. GPT-4 2023-yilning mart oyida chiqarilgan, biroq avvalgilardan farqli o‘laroq, yopiq model bo‘lib qolmoqda – buni insoniyat manfaatlaridan ko‘ra tijorat nuqtayi nazaridan kelib chiqqan harakat, deb hisoblaydi Mask.
“GPT-4’ning ichki tafsilotlari faqat OpenAI va Microsoft’ga ma’lum. Shuning uchun u ochiq sun’iy intellektga qarama-qarshidir va tijorat sabablarga ko‘ra yopiq: Microsoft GPT-4 ni ommaga sotish orqali boylik orttirmoqchi, agar OpenAI talab qilinganidek texnologiyani jamoatchilikka bepul taqdim etsa, bunga erishib bo‘lmaydi.
Ta’sis shartnomasidan farqli o‘laroq, sudlanuvchilar GPT-4 dan insoniyat manfaati uchun emas, balki dunyodagi eng yirik kompaniyaning daromadlarini maksimal darajada oshirish uchun xususiy texnologiya sifatida foydalanishni tanladi, — deydi Mask da’vo arizasida.
Uning ta’kidlashicha, hozirgi OpenAI kengashi a’zolari texnologiyani qo‘llab-quvvatlaydigan va tushunadigan olimlar va tadqiqotchilar emas.
OpenAI, Inc.ning bir paytlar puxta ishlab chiqilgan notijorat tuzilmasi o‘rniga faqat foyda olishga qaratilgan bosh direktor va past texnik tajribaga ega bo‘lgan kengash egalladi. Endi kengashda kuzatuvchi o‘rindig‘i faqat Microsoft uchun ajratilgan, — deydi milliarder o‘z da’vosida.
Izoh (0)