Yaponiyaning Tokio shahrida kardiologiya sohasidagi eng nufuzli xalqaro tadbirlardan biri – 89-Xalqaro kardiologlar konferensiyasi (JCS 2025 Annual Meeting) bo‘lib o‘tdi. Unda dunyoning yetakchi olimlari, shifokorlar va soha mutaxassislari bilan birga O‘zbekistondan tashrif buyurgan kardiolog olimlar ham munosib ishtirok etishdi.
Jumladan, O‘zbekiston Respublikasi Sog‘liqni saqlash vazirligi tasarrufidagi Respublika ixtisoslashtirilgan kardiologiya ilmiy-amaliy tibbiyot markazining yosh va iqtidorli olimasi, yetakchi shifokor Zarina Mashkurova o‘z ilmiy ishi doirasidagi to‘lqin tezligini aniqlash masalalari yuzasidan muvaffaqiyatli taqdimot qildi.
Aytish joizki hamyurtimizning “Azilsartan va indapamid yoki nitrendipin kombinatsiyasi arterial gipertoniyada impuls to‘lqini tezligiga qanday ta’sir qiladi?” mavzusidagi ma’ruzasi konferensiya ishtirokchilarining alohida e’tiboriga sazovor bo‘ldi.
Tadqiqotda arterial gipertoniyaga chalingan bemorlarda impuls to‘lqini tezligi (Pulse Wave Velocity – PWV) orqali yurak-qon tomir tizimining holatini baholash va bu ko‘rsatkichlar orqali bemorlarning individual terapiyasini shakllantirish masalalari qamrab olingan.
Zarina Mashkurovaning tadqiqoti aniqligi, metodikasining puxtaligi, statistik tahlilning yuqori darajasi va klinik ahamiyati nuqtai nazaridan Yaponiya, Janubiy Koreya, Germaniya va boshqa davlatlardan kelgan soha mutaxassislarining e’tiborini tortdi.
"Anjumanda xorijlik hamkasblar bilan tajriba almashish imkoniyati biz, o‘zbekistonlik yosh olimlar uchun juda muhim ahamiyatga ega bo‘ldi. Shuningdek, tadbirning yuqori tashkiliy darajada o‘tkazilganligi va yapon mezbonlarning samimiy munosabati bizda ijobiy taassurot qoldirdi," – dedi Zarina Mashkurova.
Ahamiyatlisi, mamlakatimiz kardiologlarining bunday xalqaro anjumanlardagi faol ishtiroki yurtimiz tibbiyotining jahon hamjamiyatidagi nufuzini oshirish bilan birga, yosh olimlarimiz uchun ham yangi va istiqbolli imkoniyatlarni ochib beradi.
Izoh (0)