Xitoyning Venchjou tibbiyot universiteti olimlari ichimlik tanlashning depressiya va xavotir rivojlanishi xavfi bilan bog‘liq bo‘lishi mumkinligini aniqladilar. Tadqiqot natijalari Journal of Affective Disorders jurnalida chop etildi.
Tahlil 37 yoshdan 73 yoshgacha bo‘lgan 188 ming kishining ma’lumotlariga asoslangan. Ular o‘rtacha 11 yil davomida kuzatildi va turli xil ichimliklarni iste’mol qilishning depressiya va xavotirning yangi holatlari bilan qanday bog‘liqligi o‘rganildi.
60 yoshdan kichik odamlarda shirin ichimliklarni muntazam iste’mol qilish, gazli ichimliklar va shakarli sharbatlar ichganlarda 14 foizga, sun’iy shirinlashtiruvchi qo‘shilgan ichimliklarni tanlaganlarda esa 23 foizga depressiya xavfini oshirgan. Yangi meva va sabzavot sharbatlari yoki qahva ichganlarda esa aksincha, xavf mos ravishda 19 va 12 foizga pastroq bo‘lgan.
Keksa odamlarda shirin ichimliklar va ruhiy salomatlik o‘rtasida bog‘liqlik topilmadi. Ammo qahva va sharbatlar hamon foydali bo‘lib chiqdi — ular depressiya va xavotir xavfini kamaytirdi.
Tadqiqotchilar bir ichimlik boshqasiga almashtirilsa, nima bo‘lishini alohida o‘rganishdi. Shunday qilib gazli ichimlikdan sharbatga o‘tish depressiya xavfini 16 foizga kamaytirdi.
Olimlar ta’kidlashicha: ularning xulosalari aynan ichimliklar kasallik keltirib chiqarishi yoki uning oldini olishini isbotlamaydi. Ammo natijalar ovqatlanishdagi kichik o‘zgarishlar ham ruhiy salomatlikka ta’sir qilishi mumkinligini tasdiqlaydi.
Izoh (0)