Saraton — ko‘plab insonlar qatori mashhurlarni ham ayab o‘tirmaydigan kasallik. Shon-shuhrat, boylik yoki muxlislarning mehri bu dahshatli tashxisdan asrab qola olmaydi. Quyida hayoti davomida jasorat bilan kurashgan va oxir-oqibat bevaqt olamdan o‘tgan mashhur aktyor va aktrisalar haqida so‘z yuritamiz.
1. Patrik Sueyzi
2008-yilda “Ruh” filmi yulduziga me’da osti bezi saratoni tashxisi qo‘yilgan. Kasallik juda kech bosqichda aniqlangan. Shifokorlar uning atigi bir necha yil umri qoldi deb hisoblashgan. Dastlab aktyor kimyoterapiyadan voz kechdi, lekin oila a’zolari uni intensiv davolanishga ko‘ndirishga muvaffaq bo‘lishdi.
O‘sha yilning iyul oyida Patrik intervyu berib, saratonga qarshi muvaffaqiyatli kurashayotganini va sog‘ayishga umid qilayotganini aytdi. 2009-yil yanvar oyida u zotiljam bilan shifoxonaga yotqizildi, biroq keyinroq jurnalistlarga hali uzoq yashash niyati borligini aytdi.
Sueyzi hayot ritmini susaytirmaslikka harakat qilgan: u “Yovuzlik” teleserialida FBR agentini o‘ynagan, rafiqasi Liza Niyemi bilan birga xotiralar kitobini yozishni rejalashtirgan. Navbatdagi kimyoterapiyadan keyin uni ayoli bilan mashina xarid qilayotgan holatda ko‘rishgan. Ammo aprel oyida aktyorda jigar metastazlari aniqlandi va davolanish samara bermadi. Patrik Sueyzi 2009-yil 14-sentyabrda 57 yoshida vafot etdi.
2. Shennen Doerti
“Sehrlanganlar” serialida Pru Hollivel rolini o‘ynagan aktrisaga 2015-yilda ko‘krak bezi saratoni tashxisi qo‘yilgan. Doerti darhol davolanishni boshladi va kasallik remissiyaga tushdi. So‘ng aktrisa faoliyatini davom ettirgan, biroq 2020-yilda kasallik qaytalandi va 4-bosqichda ekanligi ma’lum bo‘ldi.
Shennen operatsiya qilindi, nur terapiyasini boshidan o‘tkazdi, ammo 2023-yil iyun oyida saraton hujayralari uning bosh miya sohasiga tarqalgani ma’lum bo‘ldi. Aktrisa yana og‘ir davolanish terapiyalarini boshlashiga to‘g‘ri keldi. Sog‘lig‘i bilan bog‘liq muammolarga turmush o‘rtog‘i Kurt Isvarinko bilan ajrim jarayoni ham ta’sir ko‘rsatdi. Shennenning aytishicha, u aliment to‘lamaslik uchun ajrashishga rozilik bermagan. Yangi yil arafasida bergan podkastida aktrisa turmush o‘rtog‘ining xiyonatini murakkab operatsiyadan bir necha daqiqa avval bilib qolganini aytgan. Afsuski, Shennen Doerti 2024-yil 13-iyulda 53 yoshida vafot etdi.
3. Alan Rikman
Aktyor birinchi bor 2005-yilda, “Garri Potter” filmidagi professor Sneyp rolini ijro etayotgan paytda saraton bilan yuzma-yuz kelgan. Unga prostata saratoni tashxisi qo‘yildi. Alan murakkab operatsiya o‘tkazdi va kasallikni yengdi, shunga qaramay, u “Feniks ordeni” filmidagi ishini to‘xtatmadi va kino yakunlanishigacha rol o‘ynadi.
2015-yilda Alan mini insultni boshdan kechirdi. Shifoxonada unga me’da osti bezi saratoni tashxisi qo‘yildi. Xuddi shu kasallikdan otasi ham vafot etgan edi. Kasallik bir muddat alomat bermadi, ammo keyin tez sur’atda rivojlandi. 2016-yil 14-yanvarda Alan 70 yoshiga besh hafta qolganda hayotdan ko‘z yumdi.
2022-yilda Alan Rikmanning 25 yil davomida yuritgan shaxsiy kundaliklariga asoslangan memuarlari chop etildi.
4. Chedvik Bouzman
2020-yil aprel oyida Marvel filmlari yulduzi va “Qora pantera” filmidagi bosh rol ijrochisi ijtimoiy tarmoqlarda videomurojaat e’lon qildi. Ammo muxlislarning e’tiborini loyiha emas, aktyorning holati jalb qildi — u juda ozib ketgan va kasal ko‘rinar edi. Ular sog‘lig‘i haqida so‘ray boshlashdi, ammo Chedvik hech narsa demadi. Ko‘pchilik bu holatni yangi rolga tayyorgarlik deb o‘yladi. Aslida esa, 2016-yilda unda 3-bosqichdagi yo‘g‘on ichak saratoni aniqlangan edi.
Bousman 2020-yil 28-avgustda Los Anjelesdagi uyida vafot etdi. U atigi 43 yoshda edi. U “Ma Reyni: Blyuz onasi” filmidagi roli bilan vafotidan so‘ng “Oskar” mukofotiga nomzod bo‘lgan kam sonli aktyorlardan biri bo‘lib tarixga kirdi.
5. Kyorsti Elli
“Oltin Globus” sovrindori va “Ikki odam: men va mening soyam” filmidagi rol bilan tanilgan Kyorsti Elli eng makkor saraton turlaridan biriga duch keldi. Yo‘g‘on ichakdagi o‘simta uzoq vaqt belgi bermay, juda tez rivojlandi. U 2022-yil may oyida bel og‘rig‘i sabab shifokorga murojaat qilganida saraton tashxisi qo‘yildi.
Kyorsti bu jarayon allaqachon xavfli bosqichda ekanligini bilmasdi. Barcha bosqichlardagi davolanishga qaramay, kasallik ustun keldi. 2022-yil 6-dekabr kuni, 71 yoshida, farzandlari va yaqinlari qurshovida vafot etdi.
6. Odri Hepbern
Uning iste’dodi va nafisligiga hanuzgacha qoyil qolishadi. Kinematografiyadan tashqari, Odri Hepbern xayriya ishlari bilan shug‘ullangan va BMT bolalar fondining ezgu niyat elchisi bo‘lgan. Bir safar Somaliga safar chog‘ida qorni og‘rib qolgan, ammo u safarni bekor qilmagan. Shveysariyadagi tekshiruvlar hech narsa aniqlamadi. Oradan biroz vaqt o‘tib, unga qorinning ichki qismida joylashgan, kam uchraydigan saraton tashxisi qo‘yildi.
O‘sma bir necha yil davomida o‘sib, ingichka ichakka tarqalgan edi. Operatsiyadan so‘ng Odri kimyoterapiya kursini oldi. Shifokorlar ijobiy prognoz bergan bo‘lsa-da, bir oy o‘tgach, kuchli og‘riqlar bilan yana kasalxonaga yotqizildi. Tadqiqotlar kasallik yo‘g‘on ichakka ham tarqalganini ko‘rsatdi.
So‘nggi Yangi yil bayramini u o‘g‘illari va sevimli insoni — aktyor Robert Valders bilan o‘tkazdi. Odri Hepbern 1993-yil 20-yanvarda 63 yoshida vafot etdi.
Izoh (0)