Саратон — кўплаб инсонлар қатори машҳурларни ҳам аяб ўтирмайдиган касаллик. Шон-шуҳрат, бойлик ёки мухлисларнинг меҳри бу даҳшатли ташхисдан асраб қола олмайди. Қуйида ҳаёти давомида жасорат билан курашган ва охир-оқибат бевақт оламдан ўтган машҳур актёр ва актрисалар ҳақида сўз юритамиз.
1. Патрик Суэйзи
2008 йилда “Руҳ” фильми юлдузига меъда ости бези саратони ташхиси қўйилган. Касаллик жуда кеч босқичда аниқланган. Шифокорлар унинг атиги бир неча йил умри қолди деб ҳисоблашган. Дастлаб актёр кимётерапиядан воз кечди, лекин оила аъзолари уни интенсив даволанишга кўндиришга муваффақ бўлишди.
Ўша йилнинг июль ойида Патрик интервью бериб, саратонга қарши муваффақиятли курашаётганини ва соғайишга умид қилаётганини айтди. 2009 йил январь ойида у зотилжам билан шифохонага ётқизилди, бироқ кейинроқ журналистларга ҳали узоқ яшаш нияти борлигини айтди.
Суэйзи ҳаёт ритмини сусайтирмасликка ҳаракат қилган: у “Ёвузлик” телесериалида ФБР агентини ўйнаган, рафиқаси Лиза Ниеми билан бирга хотиралар китобини ёзишни режалаштирган. Навбатдаги кимётерапиядан кейин уни аёли билан машина харид қилаётган ҳолатда кўришган. Аммо апрель ойида актёрда жигар метастазлари аниқланди ва даволаниш самара бермади. Патрик Суэйзи 2009 йил 14 сентябрда 57 ёшида вафот этди.
2. Шеннен Доэрти
“Сеҳрланганлар” сериалида Пру Ҳолливел ролини ўйнаган актрисага 2015 йилда кўкрак бези саратони ташхиси қўйилган. Доэрти дарҳол даволанишни бошлади ва касаллик ремиссияга тушди. Сўнг актриса фаолиятини давом эттирган, бироқ 2020 йилда касаллик қайталанди ва 4-босқичда эканлиги маълум бўлди.
Шеннен операция қилинди, нур терапиясини бошидан ўтказди, аммо 2023 йил июнь ойида саратон ҳужайралари унинг бош мия соҳасига тарқалгани маълум бўлди. Актриса яна оғир даволаниш терапияларини бошлашига тўғри келди. Соғлиғи билан боғлиқ муаммоларга турмуш ўртоғи Курт Исваринко билан ажрим жараёни ҳам таъсир кўрсатди. Шенненнинг айтишича, у алимент тўламаслик учун ажрашишга розилик бермаган. Янги йил арафасида берган подкастида актриса турмуш ўртоғининг хиёнатини мураккаб операциядан бир неча дақиқа аввал билиб қолганини айтган. Афсуски, Шеннен Доэрти 2024 йил 13 июлда 53 ёшида вафот этди.
3. Алан Рикман
Актёр биринчи бор 2005 йилда, “Гарри Поттер” фильмидаги профессор Снейп ролини ижро этаётган пайтда саратон билан юзма-юз келган. Унга простата саратони ташхиси қўйилди. Алан мураккаб операция ўтказди ва касалликни енгди, шунга қарамай, у “Феникс ордени” фильмидаги ишини тўхтатмади ва кино якунланишигача рол ўйнади.
2015 йилда Алан мини инсультни бошдан кечирди. Шифохонада унга меъда ости бези саратони ташхиси қўйилди. Худди шу касалликдан отаси ҳам вафот этган эди. Касаллик бир муддат аломат бермади, аммо кейин тез суръатда ривожланди. 2016 йил 14 январда Алан 70 ёшига беш ҳафта қолганда ҳаётдан кўз юмди.
2022 йилда Алан Рикманнинг 25 йил давомида юритган шахсий кундаликларига асосланган мемуарлари чоп этилди.
4. Чедвик Боузман
2020 йил апрель ойида Marvel фильмлари юлдузи ва “Қора пантера” фильмидаги бош рол ижрочиси ижтимоий тармоқларда видеомурожаат эълон қилди. Аммо мухлисларнинг эътиборини лойиҳа эмас, актёрнинг ҳолати жалб қилди — у жуда озиб кетган ва касал кўринар эди. Улар соғлиғи ҳақида сўрай бошлашди, аммо Чедвик ҳеч нарса демади. Кўпчилик бу ҳолатни янги ролга тайёргарлик деб ўйлади. Аслида эса, 2016 йилда унда 3-босқичдаги йўғон ичак саратони аниқланган эди.
Боусман 2020 йил 28 августда Лос Анжелесдаги уйида вафот этди. У атиги 43 ёшда эди. У “Ма Рейни: Блюз онаси” фильмидаги роли билан вафотидан сўнг “Оскар” мукофотига номзод бўлган кам сонли актёрлардан бири бўлиб тарихга кирди.
5. Кёрсти Элли
“Олтин Глобус” совриндори ва “Икки одам: мен ва менинг соям” фильмидаги рол билан танилган Кёрсти Элли энг маккор саратон турларидан бирига дуч келди. Йўғон ичакдаги ўсимта узоқ вақт белги бермай, жуда тез ривожланди. У 2022 йил май ойида бел оғриғи сабаб шифокорга мурожаат қилганида саратон ташхиси қўйилди.
Кёрсти бу жараён аллақачон хавфли босқичда эканлигини билмасди. Барча босқичлардаги даволанишга қарамай, касаллик устун келди. 2022 йил 6 декабрь куни, 71 ёшида, фарзандлари ва яқинлари қуршовида вафот этди.
6. Одри Ҳепберн
Унинг истеъдоди ва нафислигига ҳанузгача қойил қолишади. Кинематографиядан ташқари, Одри Ҳепберн хайрия ишлари билан шуғулланган ва БМТ болалар фондининг эзгу ният элчиси бўлган. Бир сафар Сомалига сафар чоғида қорни оғриб қолган, аммо у сафарни бекор қилмаган. Швейцариядаги текширувлар ҳеч нарса аниқламади. Орадан бир оз вақт ўтиб, унга қориннинг ички қисмида жойлашган, кам учрайдиган саратон ташхиси қўйилди.
Ўсма бир неча йил давомида ўсиб, ингичка ичакка тарқалган эди. Операциядан сўнг Одри кимётерапия курсини олди. Шифокорлар ижобий прогноз берган бўлса-да, бир ой ўтгач, кучли оғриқлар билан яна касалхонага ётқизилди. Тадқиқотлар касаллик йўғон ичакка ҳам тарқалганини кўрсатди.
Сўнгги Янги йил байрамини у ўғиллари ва севимли инсони — актёр Роберт Валдерс билан ўтказди. Одри Ҳепберн 1993 йил 20 январда 63 ёшида вафот этди.
Изоҳ (0)