Kino bu — voqelik o‘ziga xos qonuniyatlarga bo‘ysunadigan olam. Haqiqiy hayotda personajlarning gapirishi va o‘zini tutishi ekranda ko‘ringanidek bo‘lavermaydi.
Hamma narsa birinchi urinishdayoq yaxshi chiqadi
Film janri superqahramonlik bo‘lmasa-da, personajlarda qandaydir g‘ayritabiiy qobiliyatlar mavjud bo‘ladi. Aks holda, oddiy odam ko‘p ter to‘kib bajarishi kerak bo‘lgan ishni ular qanday qilib darrov uddalashlarini tushuntirib bo‘lmaydi. Masalan, qahramonning shunchaki kesib tashlangan sochi xuddi salondan chiqqandek ko‘rinishga ega bo‘ladi.
Cheklanmagan resurslar
Kambag‘al talabalar yoki ofitsiantlar haqidagi, ular nima uchundir o‘z imkoniyatlaridan ortiq darajada hashamatli turar joy sotib olishlari mumkinligi to‘g‘risidagi hikoyalar allaqachon jonga teggan. Bundan tashqari, qahramonlar ko‘pincha narsalar va pullarni xuddi ular uchun hech qanday qiymati yo‘qdek behuda sarflaydi.
Odob-axloq qoidalarini nazarga ilmaslik
Yomon filmlar haqida gap ketganda, ularning asosiy xususiyatlaridan biri aktyorlarning sun’iy ijrosidir. Ammo hatto mashhur rejissyorlarning asarlari ham ba’zida personajlarning asossiz ravishda qo‘pol xatti-harakatlarini ko‘rsatish bilan xatoga yo‘l qo‘yadi. Masalan, film qahramonlari gaplasha turib, telefon go‘shagini uloqtirishi yoki videochatdagi suhbat paytida jahl qilib, noutbukni shartta yopib ketishi ko‘plab filmlarda uchraydigan holat.
Aqlbovar qilmas haydovchilik mahorati
Ko‘pincha qahramonlar avtomobil, motosikl, ba’zan esa hatto yaxta yoki samolyotni mohirlik bilan boshqaradi. Bunday ekstremal haydash ko‘nikmalari shunchalik oson o‘zlashtirilishi tomoshabinlarda shubha uyg‘otadi.
O‘zaro munosabatlardagi mantiqsizlik
Format talablariga bo‘ysunib, xoh dinamik blokbaster bo‘lsin, xoh kichik hajmli sitkom, ko‘pincha personajlar o‘rtasidagi munosabatlarda mantiq yetishmaydi. Masalan, qandaydir mojaro yoki hodisa yuz beradi. So‘ngra bu voqeaga aralashgan odamlar uyga yoki boshqa joyga borishgach, suhbatni qayta boshlashadi. Ammo negadir mashinada buni muhokama qilishmaydi. Xuddi ular uyga yetib borguncha hamma narsani to‘xtatib qo‘ygandek.
Xavfli vaziyatdagi xatti-harakat
Dahshatli film janrining asosiy qoidasi: qahramonlar o‘zlarini ahmoqlardek tutishlari shart, aks holda voqealar rivojlanmaydi. Agar qahramonlar qochmoqchi bo‘lsa, albatta tomga chiqadi. Yoki bir to‘da odamlar dahshatli joyga kelishi bilan boshqa-boshqa taraflarga bo‘linib ketishadi.
Izoh (0)