Кино бу — воқелик ўзига хос қонуниятларга бўйсунадиган олам. Ҳақиқий ҳаётда персонажларнинг гапириши ва ўзини тутиши экранда кўринганидек бўлавермайди.
Ҳамма нарса биринчи уринишдаёқ яхши чиқади
Фильм жанри суперқаҳрамонлик бўлмаса-да, персонажларда қандайдир ғайритабиий қобилиятлар мавжуд бўлади. Акс ҳолда, оддий одам кўп тер тўкиб бажариши керак бўлган ишни улар қандай қилиб дарров уддалашларини тушунтириб бўлмайди. Масалан, қаҳрамоннинг шунчаки кесиб ташланган сочи худди салондан чиққандек кўринишга эга бўлади.
Чекланмаган ресурслар
Камбағал талабалар ёки официантлар ҳақидаги, улар нима учундир ўз имкониятларидан ортиқ даражада ҳашаматли турар жой сотиб олишлари мумкинлиги тўғрисидаги ҳикоялар аллақачон жонга тегган. Бундан ташқари, қаҳрамонлар кўпинча нарсалар ва пулларни худди улар учун ҳеч қандай қиймати йўқдек беҳуда сарфлайди.
Одоб-ахлоқ қоидаларини назарга илмаслик
Ёмон фильмлар ҳақида гап кетганда, уларнинг асосий хусусиятларидан бири актёрларнинг сунъий ижросидир. Аммо ҳатто машҳур режиссёрларнинг асарлари ҳам баъзида персонажларнинг асоссиз равишда қўпол хатти-ҳаракатларини кўрсатиш билан хатога йўл қўяди. Масалан, фильм қаҳрамонлари гаплаша туриб, телефон гўшагини улоқтириши ёки видеочатдаги суҳбат пайтида жаҳл қилиб, ноутбукни шартта ёпиб кетиши кўплаб фильмларда учрайдиган ҳолат.
Ақл бовар қилмас ҳайдовчилик маҳорати
Кўпинча қаҳрамонлар автомобиль, мотоцикл, баъзан эса ҳатто яхта ёки самолётни моҳирлик билан бошқаради. Бундай экстремал ҳайдаш кўникмалари шунчалик осон ўзлаштирилиши томошабинларда шубҳа уйғотади.
Ўзаро муносабатлардаги мантиқсизлик
Формат талабларига бўйсуниб, хоҳ динамик блокбастер бўлсин, хоҳ кичик ҳажмли ситком, кўпинча персонажлар ўртасидаги муносабатларда мантиқ етишмайди. Масалан, қандайдир можаро ёки ҳодиса юз беради. Сўнгра бу воқеага аралашган одамлар уйга ёки бошқа жойга боришгач, суҳбатни қайта бошлашади. Аммо негадир машинада буни муҳокама қилишмайди. Худди улар уйга етиб боргунча ҳамма нарсани тўхтатиб қўйгандек.
Хавфли вазиятдаги хатти-ҳаракат
Даҳшатли фильм жанрининг асосий қоидаси: қаҳрамонлар ўзларини аҳмоқлардек тутишлари шарт, акс ҳолда воқеалар ривожланмайди. Агар қаҳрамонлар қочмоқчи бўлса, албатта томга чиқади. Ёки бир тўда одамлар даҳшатли жойга келиши билан бошқа-бошқа тарафларга бўлиниб кетишади.
Изоҳ (0)