Ukraina prezidenti Vladimir Zelenskiy AQSH prezidenti Donald Tramp bilan telefon orqali suhbatlashganini ma’lum qildi. Suhbatda nomi oshkor etilmagan Yevropa yetakchilari ham ishtirok etgan.
Muhokama Trampning vakili Stiven Vitkoff va Rossiya prezidenti Vladimir Putinning Moskvadagi uchrashuvi natijalariga bag‘ishlangan.
Zelenskiyning ta’kidlashicha, Ukraina va uning hamkorlarining pozitsiyasi aniq: urush adolatli shartlar asosida tugashi kerak.
“Biz Moskvada aytilgan gaplarni muhokama qildik. Ukraina, shubhasiz, o‘z mustaqilligini himoya qiladi. Barchamizga mustahkam va ishonchli tinchlik zarur. Rossiya o‘zi boshlagan urushni to‘xtatishi shart”, deya yozdi u.
Suhbat Zelenskiy Sumi viloyatidagi front chizig‘idan qaytayotgan paytda bo‘lib o‘tgan. U Yevropa yetakchilariga qo‘llab-quvvatlaganlari uchun minnatdorchilik bildirib, tinchlikka erishish yo‘lidagi hamkorlik muhimligini ta’kidlagan.
Ukraina rahbari mamlakatining uzoq muddatli tinchlikka intilib, mustaqillikni himoya qilishni davom ettirishini aytgan. Shuningdek, u mojaroda Ukrainani qo‘llab-quvvatlayotgan barchaga tashakkur bildirgan.
Bugun, 6-avgust kuni Amerika Qo‘shma Shtatlari prezidentining Ukraina bo‘yicha maxsus vakili Stiv Uitkoff Kremlda Rossiya prezidenti Vladimir Putin bilan muzokaralar o‘tkazdi.
AQSH prezidenti Donald Tramp ushbu chrashuvni “juda samarali” deb baholagan. Uning so‘zlariga ko‘ra, muzokaralar davomida “sezilarli yutuqlarga erishilgan” va “barcha urushni tugatish zarurligiga rozi” ekanini ta’kidlagan.
“Mening maxsus vakilim Stiv Uitkoff yaqinda Rossiya prezidenti Vladimir Putin bilan g‘oyat samarali uchrashuv o‘tkazdi. Katta muvaffaqiyatlarga erishildi! Shundan so‘ng men ayrim Yevropalik ittifoqchilarimizni xabardor qildim. Barcha urush to‘xtashi kerakligiga rozi va biz bu borada kelgusi kunlar va haftalarda ish olib boramiz”, - deya yozgan Amerika rahbari Truth Social ijtimoiy tarmog‘idagi sahifasida.
Izoh (0)