АҚШ Соғлиқни сақлаш ва ижтимоий хизматлар вазирлиги раҳбари кичик Роберт Кеннеди соғлиқни сақлаш тизимини умумий қайта қуриш доирасида 10 минг ходимни қисқартириш режалаштирилаётганини эълон қилди. Бу ҳақда MarketWatch хабар бермоқда.
Соғлиқни сақлаш вазирлиги раҳбари ўзининг видеомурожаатида вазирлик ва унинг тасарруфидаги бўлинмалар самарасиз ишлаётганини таъкидлаган.
Кеннедининг айтишича, қайта ташкил этиш натижасида вазирлик бўлинмалари сони 28 тадан 15 тага қисқартирилади, бешта минтақавий бўлим эса ёпилади.
Вазирликнинг умумий ходимлар сонини тахминан чорак қисмга — 82 мингдан 62 минггача қисқартириш режалаштирилмоқда. Дональд Трамп президентлик лавозимига киришганидан сўнг, 10 мингга яқин ходим соғлиқни сақлаш тузилмаларини ўз ихтиёри билан тарк этган.
Wall Street Journal газетаси маълумотларига кўра, янги қисқартиришлар, хусусан, Озиқ-овқат ва дори-дармонлар сифатини назорат қилиш бошқармасига таъсир қилишини, у ерда 3,5 минг ходим (тахминан 19 фоиз ходимлар), касалликларни назорат қилиш ва олдини олиш марказларида 2,4 минг (18 фоиз ходимлар), шунингдек, миллий соғлиқни сақлаш институтларида 1,2 минг (6 фоиз ходимлар) ишдан бўшатилиши режалаштирилмоқда.
Ислоҳотларнинг асосий вазифаларидан бири ҳозирда Соғлиқни сақлаш вазирлигининг бўлимлари ва ҳатто филиаллари ўртасида тақсимланган алоқалар, харидлар, кадрлар, IT-ресурслар ва сиёсатни режалаштириш функцияларини марказлаштиришдир.
WSJ ҳавола қилган ҳужжатларда таъкидланишича, бу қайта ташкил этиш муҳим тиббий хизматларни кўрсатишга таъсир қилмайди.
Изоҳ (0)