AQSH armiyasining to‘rt nafar harbiy xizmatchisi Litvaning Pabrade shahridagi markaziy harbiy poligonda taktik mashg‘ulotlar yakunlanganidan so‘ng halok bo‘lgan. Bu haqda Litvaning Lrytas yangiliklar portali ma’lum qilgan.
Portal ma’lumotlariga ko‘ra, to‘rt nafar amerikalik seshanba kuni kechqurun gusenitsali transport vositasida mashg‘ulotlardan chiqib ketgan va bedarak yo‘qolgan. Chorshanba kuni uzoq davom etgan qidiruv ishlaridan so‘ng ularning mashinasi botqoqlikdan topilgan. Ta’kidlanishicha, barcha harbiylar halok bo‘lgan. Biroq rasmiylar buni tasdiqlamagan.
“Hozirda voqea sodir bo‘lishi mumkin bo‘lgan joy aniqlangan, Litva armiyasi boshchiligidagi qidiruv-qutqaruv operatsiyasi davom etmoqda. Qo‘shimcha ravishda Yong‘indan saqlash va qutqaruv departamenti, shuningdek, boshqa idoralarning kuchlari jalb qilingan”, deya ma’lum qilgan Litva armiyasi.
Hodisa haqidagi ma’lumotni AQSH armiyasining Yevropa va Afrikadagi qo‘mondonligi ham tasdiqlagan.
Qayd etilishicha, qidiruv ishlari AQSH va Litva harbiylari, Litva huquq-tartibot idoralari va boshqa idoralar tomonidan olib borilmoqda.
Izoh (0)