Air France aviakompaniyasining Parijdan Gvadelupadagi Puent-a-Pitr shahriga uchayotgan samolyoti yo‘lovchi bortda telefonini yo‘qotib qo‘ygani uchun aeroportga qaytishga majbur bo‘ldi. Bu haqda The Daily Mail xabar berdi.
Samolyot bortida 375 nafar yo‘lovchi va 12 nafar ekipaj bo‘lgan. Uchoq ehtiyot chorasi sifatida ortga qaytishga qaror qilgan. U havoda bor-yo‘g‘i ikki soat bo‘lgan. Hodisa 21-mart kuni yuz bergani aytilmoqda.
FlightRadar24 ma’lumotlariga ko‘ra, layner Parijning Orli aeroportiga qaytishdan oldin Fransiyaning g‘arbiy qirg‘oqlari yaqinida bir marta aylanib chiqqan. Qo‘ngandan so‘ng telefon topilgan va 20 daqiqa o‘tgach samolyot Gvadelupaga qayta parvozga ko‘tarilgan.
Yanvar oyida xuddi shu samolyot bortida yo‘lovchi telefonini ventilyatsiya teshigiga tushirib yuborgan edi. Yong‘in xavfi sababli samolyot aeroportga qaytishga majbur bo‘lgan. Bu voqea Parijdan Martinika poytaxti For-de-Fransga uchishi kerak bo‘lgan reys bilan sodir bo‘lgan.
Telefonning litiyli batareyasi shikastlangani va yong‘in xavfi mavjudligidan xavotirga tushgan ekipaj ehtiyot chorasi sifatida reysni Parijga yo‘naltirishga qaror qildi, deya aviakompaniya vakilllari holatga izoh berdi.
Aksariyat reyslar elektron qurilmalarga nisbatan qat’iy siyosatga ega. Air France kompaniyasining elektronika siyosatiga ko‘ra, yonilg‘i elementlari bo‘lgan portativ telefonlar faqat “samolyot kabinasi”ga ruxsat beriladi va agar ular 100 Vt zaryaddan oshmasa, ularni tryumga ham joylashtirish mumkin.
Parvozlar davomida, ayniqsa, uchish va qo‘nish paytida, yo‘lovchilardan qurilmalarni o‘chirish yoki “parvoz rejimi”ga o‘tkazish talab qilinadi. Bu talab AQSH Federal aviatsiya ma’muriyati (FAA) tomonidan belgilangan, chunki uyali telefon signallari samolyotning navigatsiya va aloqa tizimlariga xalaqit berishi mumkin.
FAA’ga ko‘ra, 2006-yil martidan 2025-yil fevraligacha parvozlarda tutun, yong‘in yoki haddan tashqari issiqlik bilan bog‘liq jami 86 ta mobil telefon ishtirokidagi hodisa sodir bo‘lgan.
AQSHda uchuvchi pasportini yo‘qotgani uchun samolyot ortga qaytgan edi. Samolyot bortida 257 nafar yo‘lovchi va 13 nafar ekipaj a’zosi bo‘lgan. Ikki soatlik parvozdan so‘ng samolyot San Fransiskoga qaytgan. Yo‘lovchilarga ovqatlanish va kompensatsiya uchun vaucherlar berilgan. Ular 6 soatli kechikish bilan boshqa reysda Shanxayga uchgan edi.
Izoh (0)