O‘zbekiston Bosh konsulxonasi ko‘magida Birlashgan Arab Amirliklarining Dubay shahrida mushkul ahvolda qolgan uch nafar ayol O‘zbekistonga qaytarildi, deb xabar qilmoqda “Dunyo” axborot agentligi.
Bosh konsulxonadan olingan ma’lumotlarga ko‘ra, o‘zbekistonlik I.X., I.G. va uning voyaga yetmagan farzandi I.M. 2024-yil 22-dekabr kuni yaqin qarindoshining taklifi bilan BAAga kelgan va Dubay shahrida ijara uyga joylashgan. O‘tgan vaqt mobaynida ular BAAda bo‘lish uchun viza rasmiylashtirmasdan noqonuniy yashab kelgan.
Mehmonlarni BAAga taklif qilgan shaxs 23-fevral kuni Qatarga chiqib ketayotganini aytib, aloqani uzgan. Mart oyi boshida xonadon egasi ijara pulini to‘lash kerakligini, agar ijara puli to‘lanmasa, xonadonni tark etishni talab qilib, ularni ko‘chaga haydagan.
O‘zbekistonlik ushbu fuqarolar bilan suhbat davomida ularning turar uy-joy, oziq-ovqat va vatanga qaytish uchun mablag‘lari yo‘qligi ma’lum bo‘lgan.
Bosh konsulxona xodimlari Amirliklardagi “Ayollar va bolalarga yordam ko‘rsatish markazi” xayriya tashkiloti va faol vatandoshlar bilan birgalikda yordamga muhtoj fuqarolarga barcha zarur ko‘mak ko‘rsatdi. Ularning BAAda noqonuniy yashab kelgan muddatda hisoblangan 2 ming 178 AQSH dollari miqdoridagi qarzdorlik ushbu mamlakatning tegishli organlari bilan olib borilgan muzokaralar natijasida ijobiy hal qilingan.
Uzbekistan Airways’ning BAAdagi vakolatxonasi esa fuqarolarning O‘zbekistonga qaytishi uchun Dubay—Toshkent qatnoviga hech qanday to‘lovlarsiz chipta rasmiylashtirib bergan.
Dubayda qiyin ahvolda qolgan fuqarolar
2025-yilning fevralida Dubayda 247 ming dollar qarzga botgan o‘zbekistonlikka yordam berilgandi. Fuqaro 2001-yildan 2025-yilga qadar turli sabablarga ko‘ra amirliklar hududida noqonuniy yashab kelgan. 2024-yilning fevralida BAAda kasal bo‘lib, qiyin ahvolda qolgan o‘zbekistonlik fuqaroning vatanga qaytishiga yordam berilgandi.2023-yilning avgustida Dubayda noqonuniy yashab, 24 ming dollardan ortiq qarzi bor O‘zbekiston fuqarosiga yordam berilib, vatanga qaytarilgandi.
Izoh (0)