Fransiya Prezidenti Emmanuel Makron, Ukraina prezidenti Vladimir Zelenskiy hamda Buyuk Britaniya bosh vaziri Kir Starmer Parijdagi Yelisey saroyida muzokara olib bordi. Bu haqda Sky News ma’lum qilmoqda.
Uchrashuv “istak bildirganlar koalitsiyasi” yig‘ilishi boshlanishidan oldin o‘tkazilgan. Muzokaralar tafsilotlari oshkor qilinmayapti.
Uchrashuvda 31 mamlakat delegatsiyalari va rahbarlari ishtirok etadi. Majlisni Makron va Starmer boshqaradi.
Ilgari Starmer Buyuk Britaniya va Fransiya Ukraina bilan hamkorlikda AQSHga tinchlik rejasini taqdim etish ustida ishlashini ma’lum qilgandi.
Makron va Zelenskiy ikki tomonlama uchrashuvda Ukrainada tinchlikparvar kuchlarni joylashtirish imkoniyatini muhokama qilishgan.
Xabar qilinishicha, Fransiya va Britaniya rahbarligidagi “qat’iyatli davlatlar koalitsiyasi” bir necha haftadan buyon kelajakda “o‘t ochishni to‘xtatish”ni ta’minlash uchun Ukrainaga minglab harbiylarni yuborish rejasi ustida ishlamoqda.
Reuters agentligining Yevropa diplomatik doiralaridagi manbalari ma’lum qilishicha, logistika muammolari, qo‘shinlar yetishmasligi, Rossiyaning qarshiligi va AQSH tomonidan xavfsizlik kafolatlarining yo‘qligi sababli Yevropada bu rejaning amalga oshirilishi mumkinligiga shubhalar kuchaymoqda.
Izoh (0)