Janubiy Koreya poytaxti Seul shahrida yo‘lning qatnov qismida to‘satdan paydo bo‘lgan katta o‘pirilish natijasida unga tushib ketgan erkak jasadi topildi. Bu haqda BBC News xabar bermoqda.
Voqea Gangdong tumanida sodir bo‘lgan. Haydovchi motosiklda ketayotganida, yo‘l uning tagida o‘pirilib ketgan. Qutqaruvchilar uning jasadini u tushib ketgan joydan taxminan 50 metr narida yer ostidan topishgan. Bundan oldin uning motosikli va telefonini topishga muvaffaq bo‘lingan.
Ijtimoiy tarmoqlarda keng tarqalgan ushbu hodisa oqibatida avtomobil haydovchisi ham jarohat olgan. Mashinalardan birining videoregistratoridan olingan tasvirda motosiklchining chuqurga tushib ketgani, uning oldida ketayotgan mashinaning esa undan zo‘rg‘a chiqib olgani aks etganini ko‘rish mumkin.
Halok bo‘lgan erkakning shaxsi hozircha aniqlanmagan, uning yoshi taxminan 30 atrofida ekanligi aytilmoqda.
Gangdong tumani o‘t o‘chirish bo‘limi boshlig‘i Kim Chang Sopning matbuot anjumanida ma’lum qilishicha, chuqur ichida 2000 tonna tuproq va suv aralashmasi bo‘lgan. Hokimiyat vakillari hozircha o‘pirilish sababini aytishmagan.
Seul shahar hokimiyatiga taqdim etilgan hisobotda ta’kidlanishicha, so‘nggi o‘n yil ichida shaharda 223 ta shunday o‘pirilish yuz bergan.
O‘pirilishlar hosil bo‘lishining eng keng tarqalgan sabablaridan biri ohaktosh yoki bo‘r kabi tog‘ jinslarining yemirilishidir. Inson faoliyati masalan yer qazish ishlari, o‘pirilishlar hosil bo‘lishini tezlashtirishi yoki tuproqning shu tarzda cho‘kishiga olib kelishi mumkin.
Izoh (0)